स्थानीय तहलाई खर्च गर्नै सकस

विनियोजित बजेट खर्च गर्न नसक्दा स्थानीय सरकारको प्रभावकारितामाथि नै प्रश्न उठिरहेका बेला कैलालीका स्थानीय तहमा दोस्रो चौमासिकसम्म न्यून बजेट खर्च भएको देखिएको छ । केही स्थानीय तहमा भने योजना शुरुसमेत हुन सकेको छैन ।

कैलालीका १३ वटा स्थानीय तहले चालु आर्थिक वर्ष पर्याप्त बजेट खर्च गर्न नसकेका हुन् । कोष तथा लेखा नियन्त्रक कार्यालय कैलालीका अनुसार दोस्रो चौमासिकमा स्थानीय तहको खर्च ३६ दशमलब ६ प्रतिशत मात्र भएको छ । सबैभन्दा बढी कैलारी गाउँपालिकाले ४३ दशमलब ११ प्रतिशत खर्च गरेको छ भने सबैभन्दा कम गोदावरी नगरपालिकाले ३० दशमलब ३९ प्रतिशत खर्च गरेको छ ।

यस्तै, धनगढी उपमहानगरपालिकाले ३६ दशमलब १५ प्रतिशत, गौरीगंगाले ३९ दशमलब ६१ प्रतिशत, घोडाघोडीले ३४ दशमलब ५८ प्रतिशत र टिकापुरले ३५ दशमलब ७ प्रतिशत बजेट खर्च गरेका छन् । भजनीले ३८ दशमलब ५४ प्रतिशत र लम्कीचुहा नगरपालिकाले ३९ दशमलब ४६ प्रतिशत खर्च गरेका छन् ।

गाउँपालिकाहरुमा चुरेले ३४ दशमलब ६० प्रतिशत, जानकीले ३१ दशमलब ४२ प्रतिशत, जोशीपुरले ३९ दशमलब ६७ प्रतिशत, बर्दगोरियाले ३१ दशमलब २३ प्रतिशत र मोहन्यालले ३७ दशमलब ६६ प्रतिशत खर्च गरेको कोष नियन्त्रक जगतप्रकाश भट्टले जानकारी दिए ।

प्रत्येक वर्ष दोहोरिइरहेको असारे विकासका कारणले पनि समयमै बजेट खर्च हुन नसकेको कोष तथा लेखा नियन्त्रण कार्यालयले बताएको छ । यही गतिमा पालिकाहरूले बजेट खर्च गरेमा लक्ष्य पूरा गर्न कठिनाइ हुने भट्टले बताए ।