युद्धग्रस्त सडकमै डाक्टरी सेवा

वर्षौंदेखिको युद्धसँगै अहिले कोरोना संक्रमणसँग पनि संघर्ष गर्दै आएको मध्यपूर्वी राष्ट्र यमनमा एकजना डाक्टरले भयावह परिस्थितिको आँकलन गरेर आफ्नै कारबाट सेवा दिइरहेका छन् ।

युनानी डाक्टर सामी याह्या अल–हजले कारको पछाडि लेखेका छन् ‘चिकित्सा सल्लाह चाहिएमा मलाई रोक्नुहोस्’ । उनले केही वर्षदेखि युद्धको परिस्थितिलाई मध्यनजर गरेर सामाजिक सञ्जालबाट निःशुल्क परामर्श थालेका थिए ।

गत वर्ष कोरोनासमेत थपिएपछि उनले कारलाई समेत प्रयोग गरेको बताइन्छ । हजका अनुसार सामाजिक सञ्जालबाट समाजको तल्लो तहसम्म पुग्न नसकेपछि मोबाइल चिकित्सा सेवा शुरु गरिएको हो ।

एएफपीसँगको अन्तरवार्तामा उनले भनेका छन् ‘मैले गरिब र खाँचो परेर सडकमा निस्केकाहरूको बारेमा सोचेँ । अनि जो सल्लाह लिन नमिल्ने अवस्थामा छ वा ऊसँग पैसा छैन उसैलाई सहयोग गर्ने निर्णय गरेँ ।’

यमनलाई संयुक्त राष्ट्रसंघले संसारको सबैभन्दा खराब मानवीय अवस्थाको सामना गरिरहेको मुलुकको रुपमा लिएको छ । अधिकांश यमनीहरू कुपोषण र रोगबाट ग्रसित छन् । मुलुकको स्वास्थ्य सेवा प्रणाली सबै ध्वस्त भइसकेको छ । कोरोना संक्रमण र महामारीपछि यमनको स्वास्थ्य अवस्था झन् नाजुक स्थितिमा पुगेको छ ।

उनै यमनी चिकित्सकले सामाजिक सञ्जालमा लेखेका छन् ‘हामीले गरिबहरूको स्वास्थ्यको हेरचाह गर्नैपर्छ,किनभने उनीहरूको स्वास्थ्य नै पूरै समुदायको अंश हो ।’

सडकमा चिकित्सकले गरेको निःशुल्क उपचार र प्रदान गरेको सल्लाहबारे एक जना यमनीले लेखेका छन् ‘म चाहन्छु कि सबै यमनी चिकित्सकहरूले हामी वर्तमानमा जस्तो अवस्थामा छौं त्यस्तै खालको सेवा प्रदान गरुन् ।’