तरुण दलले वडाध्यक्षको चरित्रहत्या गरेको भन्दै गाउँपालिकाको खेद

नेपाली काँग्रेसनिकट नेपाल तरुण दलले वडाध्यक्षको चरित्रहत्या गरेको भन्दै गुल्मीको इस्मा गाउँपालिकाले खेद व्यक्त गरेको छ । ५ नम्बरका वडाध्यक्षद्वारा आफ्नो व्यक्तिगत काममा लेन्थवर्कर प्रयोग भन्दै फैलाइएको समाचार अफवाहपूर्ण रहेको प्रवक्ता गनुप्रसाद अधिकारीद्वारा जारी विज्ञप्तिमा उल्लेख छ ।

विज्ञप्तिमा भनिएको छ, ‘वडाध्यक्षले आफ्नो व्यक्तिगत काममा लेन्थवर्कर प्रयोग गरेको भन्दै साउन २९ गते नेपाल तरुणदल क्षेत्र नम्बर २ ले निकालेको विज्ञप्ति र त्यसपछि विभिन्न सामाजिक सञ्जाल, अनलाइनहरुमा आएको समाचार गलत छ ।’गाउँपालिकाले लुम्बिनी प्रदेश सरकारले ल्याएको बजेटमार्फत पौवा–चापटारी सडक निर्माणको क्रममा कुलो पुरिएको र त्यसपछि ‘सडक मर्मत तथा मर्मतकर्ता व्यवस्थापन कार्यविधि,२०७६’ को दफा ९ बमोजिम गत साउन २५ र २६ गते दुई दिन लेन्थवर्कर प्रयोग गरी कुलो सफा गर्ने कार्य गरेको जानकारी दिएको छ ।

कुलो मर्मतपछि छ घरधुरीको करिब ३० रोपनी क्षेत्रफलको खेतमा पानी सुचारु भई धानरोपार्इं समेत सम्पन्न भएको पनि गाँउपालिकाले जनाएको छ ।

‘सुझबुझपूर्ण तवरबाट गरिएका कामको वास्तविक स्थिति नबुझेर व्यक्तिको चरित्र हत्या गर्नुका साथै संस्थाको बदनाम गर्ने मनशायबाट प्रेरित भई जिम्मेवार संगठनले गरेको विज्ञप्तिवाजी र मिडियाहरुमा प्रेषित भ्रमपूर्ण समाचार खेदजनक रहेको’ विज्ञप्तिमा उल्लेख छ ।