गृहको धम्कीपुर्ण विज्ञाप्ति विरुद्ध उत्रियो जनमुक्ती सेना नेपाल

नेपाल सरकारको गृह मन्त्रालयले भाद्र १८ गते जारी गरेको विज्ञप्ति विरुद्ध पुर्व जनमुक्ती सेना नेपाल उत्रिएको छ । बिदेशी मित्र राष्ट्रहरुको सहयोगमा संचालित आयोजनाका बारेमा नकारात्मक टीका टिप्पणी नगर्न र मित्र राष्ट्रहरुको बिरोध गर्नेलाई सूक्ष्म निगरानी गरीने र भारतीय प्रधानमन्त्री नरेन्द्र मोदीको पुत्ला दहन गरेको बिषयलाई लिएर निकालिएको विज्ञप्ति धम्कीपुर्ण रहेको बताउँदै बहिर्गमित जनमुक्ती सेना नेपालले गम्भीर ध्यानाकर्षण गराएको हो ।

राष्ट्रीय स्वाधीनताको पक्षमा आवाज उठाउने देशभक्त नागरिकहरुलाई त्रसित पार्ने गरि आएको धम्किबारे जनमुक्ती सेना नेपालको घोर भत्सर्ना रहेको पनि बताइएको छ । विज्ञप्ति जारी गर्दै संगठनले यसरी लोकतन्त्रको हत्या गर्दै आम नागरिकहरुलाई बोल्नबाट बंचित गराउनु निरंकुशता भएको विज्ञप्तीमा जनाइएको छ । राष्ट्रघाती एमसीसी षड्यन्त्र पुर्ण ढंगले पास गराउने खेलमा लागेमा जनमुक्ती सेना चुप लागेर नबस्ने र एमसिसी पास गराउन भुमिका खेल्ने सांसदहरुको पहिचान गरि क्षेत्र– क्षेत्रबाट भ्याकुर लखटे झै लखट्ने पनि विज्ञप्तिमा उल्लेख गरिएको छ ।

बहिर्गमित जनमुक्ती सेना नेपालका प्रबक्ता तथा उपाध्यक्ष राजन थापा (सुवास) द्धारा जारी विज्ञप्तिमा सबै नागरिकहरु राष्ट्रको पक्षमा उभिएर निरन्तर रुपमा न्यायको पक्षमा र राष्ट्रघाती एमसीसी खारेजिको अभियानमा सहभागी हुँदै दलालहरुको धम्कीबाट नडराई प्रतिबाद गर्दै अगाडि बढ्न समेत आग्रह गरिएको छ