एमसीसी स्वीकार नगर्न सरकारलाई वाईसीएलको सुझाव
![एमसीसी स्वीकार नगर्न सरकारलाई वाईसीएलको सुझाव](https://janaaastha.prixacdn.net/media/albums/241525443_1040797806737780_7564676562882200918_n_kwn0MrWGZ6.png)
सत्ता साझेदार नेकपा (माओवादी केन्द्र) निकट आबद्ध युवा संगठन वाईसीएल नेपालले यथास्थितिमा अमेरिकी सहायता परियोजना मिलेनियम च्यालेञ्ज कर्पोरेशन (एमसीसी) लाई स्वीकार नगर्न सरकारलाई सचेत गराएको छ ।
सुमन देवकोटा नेतृत्वको वाईसीएल नेपाल केन्द्रीय समितिले शुक्रबार काठमाडौंमा पत्रकार सम्मेलन गरी नेपालको संविधानसँग बाझिएका बुँदाहरु नसच्चिएसम्म उक्त सम्झौता पारित नगर्न सरकार र संघीय संसदलाई सचेत गराएको हो ।
वाईसीएलका संयोजक देवकोटाले नेपालको स्वाधिनता, सार्वभौमसत्ता र संविधानलाई बन्धक राख्ने कुनै पनि खालका अन्तर्राष्ट्रिय सहयोग, अनुदानहरु स्वीकार गर्न नसकिने बताउनुभयो ।
गत भदौ १२ गतेदेखि १५ गतेसम्म काठमाडौंमा सम्पन्न राष्ट्रिय भेलाले गरेका निर्णयहरु सार्वजनिक गर्दै वाईसीएल नेपालले भारतसँग रहेका सबै सीमा समस्या तत्काल समाधान गर्न पनि सरकारसँग माग गरेको छ ।
त्यसैगरी युवाहरुलाई रोजगारीको अवसर प्रदान गर्न, उमेर पुगेका युवा तथा विद्यार्थीहरुका लागि कोभिडविरुद्धको खोपको व्यवस्था गर्न पनि सरकारको ध्यानाकर्षण गराइएको संयोजक देवकोटाले बताउनुभयो ।
कोभिडसँग सम्बन्धित स्वास्थ्य सामग्री खरिद प्रकरणमा मुछिएकाहरुको छानबिन गरी दोषीमाथि कारबाही गर्न र त्यसमा ढिलाई नगर्न वाईसीएलले सरकारलाई दबाब दिएको छ ।
टिप्पणीहरू