फातिमा उडे पनि एमसीसीको बिरोध जारी
अमेरिकी सहयोग परियोजना एमसीसीको चर्को विरोधका बाबजुद चार दिने नेपाल भ्रमण सकेर एमसीसी उपाध्यक्ष फातिमा सुमार हिजो राति स्वदेश फर्केकी छन् । कतार एअरवेजको उडानबाट हिजो राति ९ बजेर ३५ मीनेटमा उनी दोहा हुँदै वासिङ्ग्टन फर्केकी हुन् ।
पछिल्लो चार दिन काठमाडौं लगायत मुलुकभर एमसीसीको बिरुद्धमा नाराबाजी,प्रदर्शन र सभाहरु अन्यको तुलनामा बढी नै भएका थिए । तर हिजो फातिमा फर्के पनि नेपाली राजनीतिक दल र समूहले आज पनि एमसीसीको बिरोधका कार्यक्रमलाई जारी राख्ने भएका छन् ।
आज नेपाल कम्युनिष्ट पार्टी केन्द्रीय समितिले महासचिव नेत्रविक्रम चन्द (विप्लव) को उपस्थितिमा एमसीसीको बिरोध गर्दै राजधानीमा विशाल बिरोध प्रदर्शन र जनसभा गर्ने जनाएको छ ।
त्रिपुरेश्वर,बबरमहल र लैनचौरबाट जुलुश रत्नपार्कको खुल्ला मञ्च पुगेर आमसभामा परिणत हुने बताइएको छ ।
उता राष्ट्रिय प्रजातान्त्रिक युवा संगठनले पनि एमसीसीविरुद्ध बिरोध प्रदर्शन गर्ने भएको छ । दिउँसो १ बजे बबरमहलमा कार्यक्रम राखिएको संगठनले जनाएको हो ।
त्यसैगरी हाम्रो टिम नेपाल तथा (योद्धा ग्रुप) ले एमसीसीविरुद्ध मोटरसाइकल र्यालीको कार्यक्रम राखेको छ । र्याली दिउँसो ३ बजे अनामनगरबाट शुरु हुने जानकारी दिइएको छ ।
एमसीसी प्रतिकार समूहले पनि एमसीसी सम्झौताविरुद्ध बिरोध र्याली गर्ने भनेको छ । उसले दिउँसो साढे ३ बजे बिजुली बजार पुलबाट र्याली निकाल्ने तयारी गरेको जानकारी दिएको छ ।
टिप्पणीहरू