​कलियुगमा कस्ता कस्ता काण्ड

सदरखोर डिल्लीबजारमा रहेका रमेश बाहुन नामले चिनिने सुजन पौडेल मुटुमा समस्या आएपछि वीर अस्पतालमा राखिएका छन् । जब उनी अस्पताल भर्ना भए, तब उनले जेलभित्रै बसेर चलाउने गरेको मोबाइल प्रहरीले बरामद गरेको छ । त्यसको कल डिटेल्स निकाल्दा सबभन्दा बढी सम्पर्क देखिन्छ, उनै निलम्बित डिएसपीसँग । 

नेपालगञ्जमा चेतन मानन्धर हत्याका मुख्य अभियुक्त रिगल ढकाल जुम्ला कारागारमा छन् । भीमफेदी कारागारमा शरद् गौचन हत्याका अभियोगी श्याम गुम्बे छन् । उनै डिएसपीको मध्यस्थतामा जुम्ला कारागार हुँदै डिल्लीबजार सदरखोरदेखि भीमफेदीसम्मका कैदीहरु फोनमा कुरा गर्छन्  । योजना भित्रैबाट बन्छ, कार्यान्वयनमा केही प्रहरीले सहयोग गर्छन् ।

नेपाल छिर्नुअघि शरद् गौचन हत्या अभियोगमा अहिले जेलमा रहेको गुण्डा नाइके समीरसिंह बस्नेत, रुपन्देहीमा मारिएका मनोज पुनहरुलाई सञ्चालन गर्ने मुख्य व्यक्ति भारतीय अपराधी जोगिन्दर हुन् र मध्यस्थकर्ता डिएसपी रहेको प्रहरीले बताएका छन् । 

आपराधिक गतिविधिबाट आर्जित रकमले विभिन्न होटल, रेष्टुराँमा लगानी गरेको पनि खुलेको छ । त्यसमध्ये इटहरी, बरगाछीमा राम गिरीका नाममा निर्माणाधीन तीन तारे होटलमा लगानी पुष्टि गर्न प्रहरीले अलग्गै टोली खटाएको छ । 

उता, एकजना महिलासँग एसपीको मिलेमतो हुँदा सम्पत्ति शुद्धिकरण अनुसन्धान विभागमा अर्को तनाव छ । होटल याक एण्ड यतिमा सञ्चालित क्यासिनो रोयलमा भारतीय नागरिक आशिष पटेलले लगानी गर्न खोजे । तर, उद्योग विभाग र राष्ट्रबैंकले पैसा ल्याउन अनुमति दिएन । यसपछि त्यहीँ काम गर्ने जयन्ती थापा नामक महिलाका नाममा २५ करोड पुँजी लगानी भयो । सम्पत्ति शुद्धिकरणमा उजुरी प¥यो, स्रोत के हो ?

महानिर्देशक रुपनारायण भट्टराईले एसपी प्रकाश रानाभाटलाई अनुसन्धान अधिकृत तोकिदिए । तर, प्रकाशले अनुसन्धान गरेनन्, फाइल लुकाएर राखे । उजुरकर्ताहरु अर्थमन्त्रालयसम्म पुगिसकेका छन् । यता फाइल हराएर रुपनारायण तनावमा । असईबाट जागिर खाएका एसपी प्रकाश रानाभाट ०५६ का इन्स्पेक्टर हुन् । तालिम गर्दा पूर्वमहालेखा परीक्षक विष्णुबहादुर केसीका छोरा तथा उनका व्याची (हाल एसपी) अजय केसीको जुत्ता चोरेर कारवाहीमा परेका उनी अहिले सम्पत्ति शुद्धिकरणका महानिर्देशकलाई भन्दैछन्, ‘मेरालागि यस्तो कारवाहीले केही हुँदैन ।’