श्रीमतीलाई मारेर घरभित्रै पुर्ने श्रीमान समातिए

गत पुस १६ गतेदेखि हराइरहेकी धनकुटा नगरपालिका–४, छारागाँउकी ५२ वर्षीया सीता श्रेष्ठको शव घरभित्रै फेला परेको छ । घरको भुईंतलामा हत्या गरी पुरेको अवस्थामा आज शव फेला परेको हो ।

शरीरमा विभिन्न खालका चोटहरु रहेको र शव गलेको अवस्थामा फेला परेको जिल्ला प्रहरी कार्यालयका डिएसपी सुरज कार्कीले जानकारी दिनुभयो । सीता हराएको निवेदन पुस २१ गते जिल्ला प्रहरी कार्यालयमा हालिएको थियो ।

उजुरपछि प्रहरीले कुकुर परिचालन गरेर खोजतलास गरे पनि फेला पार्न सकेको थिएन । लामो समयसम्म घटनाको विषयमा प्रहरीले केही पत्ता लगाउन नसक्दा प्रहरी चुकेको स्थानीयले आरोप लगाउन थालिसकेका थिए ।

सीताको हत्या घरायसी विवादको क्रममा उनकै श्रीमान सीताराम भनिने सीताकुमार श्रेष्ठले गरेको खुल्न आएको प्रहरीको भनाइ छ । श्रीमती हत्या गरी घरभित्र शव पुरेर फरार रहेका सीतारामलाई हिजो ललितपुरबाट पक्राउ गरी धनकुटा पुर्याइएको हो ।

घटनाको थप अनुसन्धान गरी उनीविरुद्ध कर्तव्य ज्यान शीर्षकमा मुद्दा दर्ताको तयारी गरेको प्रहरीले जानकारी दिएको छ ।