विदेशबाट ‘महिलाको नग्न भिडियो सार्वजनिक गर्छु’ भन्दै ब्ल्याकमेल गर्ने युवा एअरपोर्टमा पक्राउ

विदेशमा बसेर नेपाली महिलालाई ब्ल्याकमेल गर्ने एक युवा पक्राउ परेका छन् । सामाजिक सञ्जालमार्फत महिलाको गोप्य तस्वीर लिएर आफन्तलाई पठाई ब्ल्याकमेल गर्ने कास्की रुपा गाउँपालिका–७ सिस्नेरी का ३१ वर्षीय मुक्ति खनाल आज विदेशबाट फर्किंदै गर्दा एअरपोर्टमा समातिएका हुन्।

खनाललाई आज प्रहरीको साइबर ब्यूरोले समातेको हो । प्रहरीका अनुसार वैदेशिक रोजगारीमा रहँदा खनालले फेसबुकमा कुरा गर्ने क्रममा महिलाहरुलाई डरत्रास र प्रलोभनमा पारेर उनीहरुको नग्न तस्विर र भिडियो लिएर परिवारका सदस्यहरुसँग बार्गेनिङ्ग गर्ने गरेका थिए ।

प्रहरीले उनीविरुद्ध विद्युतीय कारोवार ऐन, २०६३ अन्तर्गतको कसूरमा मुद्दा दर्ता गरेको थियो । तर, फरार रहेका खनाल आज विदेशबाट फर्किंदै गर्दा विमानस्थलबाट समातिएका हुन् । यससम्बन्धमा थप अनुसन्धान भैरहेको प्रहरीले जानकारी दिएको छ ।