पाँच किलो सुन बोकेर नेपाल आएका झाङ विमानस्थलमा समातिए

चीनबाट सुन बोकेर आएका एक चिनियाँ नागरिक त्रिभुवन अन्तर्राष्ट्रिय विमानस्थलमा समातिएका छन् । ४ किलो ८ सय ४० ग्राम सुन लिएर विमानस्थलमा ओर्लिएका ३६ वर्षीय चिनियाँ नागरिक झाङ लिलाई हिजो विमानस्थल प्रहरीले समातेको हो ।

इजे०२४८१३१ नम्बको राहदानी बोकेका लि हिमालय एयरको उडानद्वारा नेपाल आएका थिए । उनलाई त्रिभुवन अन्तर्राष्ट्रिय विमानस्थल भन्सार कार्यालयको अराईभल टनेल गेट नजिक जाँच गर्ने क्रममा सुन फेला परेपछि प्रहरीले समातेको हो । लिले कपडाभित्र लुकाएर उक्त सुन ल्याएका थिए ।

हाल लिलाई विमानस्थल भन्सार कार्यालयमा बुझाउने तयारी भएको छ । विमानस्थल प्रहरीका प्रवक्ता हिमालकुमार श्रेष्ठले बताएअनुसार अबको केही बेरमा उनलाई सुनसहित भन्सार कार्यालयमा बुझाएर आवश्यक कारवाही प्रकृया अगाडि बढाइने छ ।