चिरपटले हानेर आमा मार्ने छोरा समातिए

आफ्नी आमाको हत्या गर्ने छोरालाई प्रहरीले पक्राउ गरेको छ । मोरङको उर्लाबारी नगरपालिका वडा नम्बर ४ आइतबारे बस्ने उनलाई प्रहरीले समातेको हो ।

पक्राउ पर्नेमा ३५ वर्षीय गंगाप्रसाद भण्डारी रहेको प्रहरीले बताएको छ । उनले आफ्नै आमालाई चिरपट प्रहार गरी हत्या गरेको प्रहरीको भनाई छ । गंगाप्रसादले हिजो बेलुका साढे ४ बजे घरयासी विवादका कारण ७० वर्षीया वृद्धा चन्द्रमाया भण्डारीलाई दाउराको चिरपट प्रहार गरेका थिए ।

चिरपट प्रहारले गम्भिर घाईते भएकी चन्द्रमायाको मदन भण्डारी अस्पताल तथा ट्रमा सेण्टर मंगलबारेमा उपचारका क्रममा राति साढे १० बजे मृत्यु भएको थियो ।

आमाको मृत्युभएपछि गंगाप्रसादलाई ईलाका प्रहरी कार्यालय उर्लाबारीले नियन्त्रणमा लिएको प्रहरीको भनाई छ । हाल उनिमाथि आवश्यक अनुसन्धान प्रक्रिया अगाडी बढाइएको छ ।