आँखामा खुर्सानीको धुलो छरेर ४२ तोला सुन, १२ लाख नगद लुटियो

प्रहरीले काठमाडौंमा आँखामा खुर्सानीको धुलो छरेर लुटपाट गर्ने दुई जनालाई समातेको छ । दाङ सौडियार गाउँपालिका–६ घर भई काठमाडौं शान्तिनगर बस्दै आएका २८ वर्षीय महेश विश्वकर्मा र घोराही उपमहानगरपालिका–८ का २४ वर्षीय राजेन्द्र सिनलाई प्रहरीले पक्राउ गरेको हो ।

उनीहरूले केही दिनअघि साँझमा चाबहिलस्थित ओम शाही टच सेन्टर सुन पसलका सञ्चालक ३४ वर्षीय अमोल भोस्लेमाथि लुटपाट गरेका थिए । महानगरीय प्रहरी परिसरका प्रवक्ता दिनेशराज मैनालीका अनुसार पसल बन्द गरेर ४२ तोला सुन तथा नगद १२ लाख लिई घर–कोठा फर्किने क्रममा चुच्चेपाटीमा भारतीय नागरिक भोस्ले लुटपाटमा परेका हुन् । उनीहरु आँखामा खुर्सानीको धुलो छर्केर कुटपिट गरेपछि सुन तथा नगद राखिएको झोला लुटेर फरार भएका थिए ।

पक्राउ परेका विश्वकर्माको साथबाट घटनामा प्रयोग भएको बा. ७४ प ९५६० नम्बरको मोटरसाइकल र नगद ६६ हजार बरामद गरिएको छ । यस्तै सिनको साथबाट रा.४ प ११२० नम्बरको मोटरसाइकल र २६१ ग्राम सुन, एक लाख रुपैयाँ, खुँडा बरामद गरिएको प्रहरीले बताएको छ ।

उक्त घटनाको सम्बन्धमा मुलुकी अपराधसंहिता ऐन, २०७४ को परिच्छेद–२० अन्तर्गत ‘डाँका गर्न नहुने’ कसुर मुद्दामा जिल्ला अदालत काठमाडौंबाट पाँच दिनको म्याद लिएर अनुसन्धान भइरहेको बताइएको छ ।