पुलमा सालकको खपेटा बेच्ने दुई भाइ नुवाकोटे च्याप्पै

काठमाडौं स्युचाटार नजिकैको पुलमा दुर्लभ वन्यजन्तु सालकको खपेटा बिक्री वितरण तथा ओसारपसार गरिरहेका दुई भाइ समातिएका छन् ।

महानगरीय प्रहरी वृत्त कालिमाटीबाट खटिएको टोलीले स्युचाटार नजिकैको चक्रपथ पुलमा सालकको खपेटा बेच्न ठिक्क परेको अवस्थामा नुवाकोटका दुई जनालाई पक्रेको हो ।

नुवाकोट पञ्चकन्या गाउँपालिका ४ घर भई काठमाण्डौको बूढानीलकण्ठ बस्ने ३४ वर्षे जयराम तामाङ र मनमैजु बस्ने ३२ वर्षे रवि तामाङ सालकको खपेटासहित पक्राउ परेका हुन् ।

उनीहरुले रातो रंगको जेब्रा झोलामा सालकको खपेटा २ किलो ५ सय ४२ ग्राम हालेका थिए । उनीहरुले प्रयोग गरेको बागमती प्रदेश ०२–०३० प ६७५१ नम्बरको मोटरसाइकल र दुई थान मोबाइल पनि बरामद भएको परिसर प्रवक्ता दिनेशराज मैनालीले जानकारी दिनुभयो ।

उनीहरुलाई थप अनुसन्धान तथा कारबाहीको निम्ति डिभिजन वन कार्यालय, हात्तिसार काठमाण्डौमा बुझाइएको छ ।