सर्लाहीको सीमानामा लागुऔषध, बारामा गाँजा

सर्लाहीको विष्णु गाउँपालिका ५ नजिकैको सीमानामा एक सय ६० बोतल लागुऔषध फेला परेको छ । भारतबाट नेपालतर्फ ल्याउँदै गरिएको उक्त लागुऔषध सशस्त्र प्रहरीको गस्ती टोलीले फेला पारेको हो ।

स्थानीय बीओपीबाट सई चेतबहादुर थापामगरको नेतृत्वमा चार जनाको टोलीले गस्ती गर्ने क्रममा लागुपदार्थ ल्याउँदै गरेको समूह ती बोतल त्यहिँ छाडेर भारततर्फ भागेको हो । टोलीले गएराति लागुपदार्थ बरामद गरेर बीओपीमा राखेको बताइएको छ ।

उता बाराको पचरौता ९ बलधुसुवामा सशस्त्र प्रहरी बलले ६० केजी गाँजा बरामद गरेको छ । सहायक प्रहरी नायव निरीक्षक लिलबहादुर थाराको नेतृत्वमा बीओपी बेनौलीबाट गएको छ जनाको टोलीले नेपालबाट भारततर्फ लाँदै गरेको पाँच पोका गाँजा बरामद गरेको हो ।

सशस्त्रको टोली देख्ने बितिक्कै चार जनाको समूह ती पोका त्यहिँ छाडेर भागेका थिए । आज दिउँसो पौने १२ बजेको समयमा बरामद भएको उक्त गाँजालाई इलाका प्रहरी कार्यालय सिम्रौनगढमा बुझाउने प्रक्रिया थालिएको सशस्त्र प्रहरी बलले जनाएको छ ।