युवकको मृत्युपछि क्वारेन्टाइनमा रहेकाहरू आतंकित

आइतबार बिहान निधन भएका बाँके नरैनापुरका २५ वर्षीय युवकको कोरोना भाइरसका कारण मृत्यु भएको पुष्टि भएसँगै क्वारेन्टाइनमा बसेकाहरू आतंकित भएका छन् ।

बाँके नरैनापुर गाउँपालिका–५ मा रहेको क्वारेन्टाइन अव्यवस्थित रहेको गुनासो गर्दै आएका उनीहरूसँगै बसेका एकको मृत्यु भएपछि आतंकित भएका हुन् ।

नरैनापुर गाउँपालिकाले क्वारेन्टाइन प्रभावकारी व्यवस्थापन नगरेको, बिरामीको थप उपचार नगरेको भन्दै आइतबार दिनभर क्वारेन्टाइनमा रहेकोहरूले विरोध गरिरहे । सुरक्षाकर्मीको भरमा सञ्चालन भइरहेको क्वारेन्टाइनमा स्वास्थ्यकर्मी नभएको प्रतिक्रिया उनीहरूले दिएका छन् ।

ती युवकको निधन हुँदा क्वारेन्टाइनमा स्वास्थ्यकर्मीहरू नभएको, उपचारमा पहल नगरेको, एम्बुलेन्स नआएको गुनासो गर्दै घटना घटिसकेपछि क्वारेन्टाइनमा पुगेका स्वास्थ्यकर्मीलाई उनीहरूले भित्र पस्नै दिएका थिएनन् । पछि सुरक्षाकर्मीको पहलमा उनीहरूभित्र छिरेका थिए ।
घटनाको विरोध गर्दै उनीहरूले खाना र नास्ता बहिष्कार गरेका थिए । वैशाख ३० गते भारतको मुम्बईबाट आएका २५ वर्षका युवा नरैनापुरको दीपेन्द्र मावि, भोजभगवानपुरको क्वारेन्टाइनमा बसेका थिए । बिहान ६.४० मा उनको मृत्यु भएको थियो । राति ३ बजेदेखि एक्कासी बान्ता हुनुका साथै ज्वरो बढेपछि उनको मृत्यु भएको थियो ।

जिल्ला स्वास्थ्य कार्यालय, बाँकेले शनिबार नरैनापुरबाट २ सय ६३ जनाको स्वाब लिँदा ती युवकको पनि लिइएको थियो । नरैनापुरमा यसअघि आठ जनामा कोरोना पोजिटिभ देखिएको थियो ।

बाँकेको विकट गाउँपालिकाको रूपमा परिचित नरैनापुर क्षेत्रमा दिनहुँ नेपाली भारतबाट नेपाल प्रवेश गरिरहेका छन् । गाउँपालिकाले व्यवस्थापन गरेका ११ वटा क्वारेन्टाइनमा ६ सय २५ जना रहेका छन् ।

स्वास्थ्य मन्त्रालयले ती युवकको निधन कोरोना भाइरसबाट भएको पुष्टि गरेपछि उनको शव राप्ती नदी किनारमा गाडिएको छ । मृतकको धर्म संस्कारअनुसार उनको शवलाई गाडिएको सम्बद्धहरूको भनाइ छ ।