‘अन्तर्वार्ता दिनसक्ने, फोटो दिन नसक्ने’

‘कसले ईलाको बिरुद्ध खबर फैलायो होला ?’ भनेर चौधरीले राखेको जिज्ञासामा पौडेलले ‘कसले हुन्छ, तपाईंकै सेलिब्रिटी सिईओको काम होला नि’ भनेर छुस्की लगाइदिएका थिए ।

राष्ट्र बैंकको एकीकृत निर्देशनमा असहज अवस्थामा बैंक तथा वित्तीय संस्थाले बोर्ड बैठक भिडियो कन्फरेन्स (भर्चुअल मिटिङ्ग) बाट पनि गर्नसक्ने व्यवस्था छ । सर्वत्र कोरोनाको त्रासले मुलुक झण्डै दुई महिनादेखि लकडाउनमा छ । तर पनि नबिल बैंकको आइतबार साँझको बोर्ड बैठकमा सञ्चालकहरु सशरिर उपस्थित भए । बैठकस्थल बैंकको केन्द्रीय कार्यालय दरबारमार्ग पनि थिएन न अध्यक्ष शम्भुप्रसाद पौडेलको निवास डिल्लीबजार नै । बोलाइएको थियो,ललितपुर सानेपास्थित डलर अर्बपति तथा काङ्ग्रेस सांसद विनोद चौधरीको निवासमा ।

बैठकस्थलमा अध्यक्ष, कम्पनी सचिव, केही सदस्य र तिनका चालक गरी झण्डै एक दर्जन भेला भए । विषम परिस्थितिमा स्वयम् अध्यक्षको घर वा निवासमा बोर्ड बैठक बस्नु कुनै नौलो नहुने राष्ट्र बैंकका अधिकारीहरु बताउँछन् । तर, अहिलेको अवस्थामा घर वा कार्यालयमा भन्दापनि भर्चुअल मिटिङ्गमा जोड दिनुपर्ने केन्द्रीय बैंकले उल्लेख गरेको छ ।

यस्तो महामारीमा बैंकको बोर्ड बैठक चौधरी निवासमा बस्नुको मनासिब कारण पनि देखिँदैन । नबिल बैंकमा विनोद र चौधरी समूहको ठूलो परिमाणमा सेयर लगानी छ । उनका छोरा निर्वाणकुमार चौधरी सञ्चालक समितिका सदस्य हुन् तर,बोर्ड अध्यक्ष भने शम्भुप्रसाद पौडेल छन् ।

स्रोतका अनुसार ईला शर्माले त्यहि बैठकमा राजीनामा बुझाएपछि बोर्डले तत्काल स्वीकृत गरेको थियो । ‘कसले ईलाको बिरुद्ध खबर फैलायो होला ?’ भनेर चौधरीले राखेको जिज्ञासामा पौडेलले ‘कसले हुन्छ, तपाईंकै सेलिब्रिटी सिईओको काम होला नि’ भनेर छुस्की लगाइदिएका थिए ।

त्यसपछि बैठकमा सबैजना अर्का सञ्चालक उपेन्द्रप्रसाद पौडेलमाथि खनिए । उनले हालै एउटा अनलाइनलाई दिएको अन्तर्वार्तामा यसअघि उनी सिईओ रहेको एनएमबी बैंकको परिचयपत्र देखिएको फोटो प्रकाशित भएकोमा सबैले सातो लिए । ‘अन्तर्वार्ता दिनसक्ने तर आफ्नो एउटा गतिलो फोटो दिन नसक्ने पनि के को नबिल बैंकको सञ्चालक !’ सबैजना पौडेललाई खिसीट्युरी गर्दै चौधरी निवासबाट बाहिरिएका थिए ।