धन्न, अर्को कैलाली काण्ड दोहोरिएन

नेपाल छिरे पनि त्यो रात या त उनी आफ्नै गाउँ गएनन् या गाउँले उरालेर गायब भए।

सामुहिक संहारको अभियोगमा थुनिएका काँग्रेस सांसद मोहम्मद अफताब आलमको भाइलाई पक्रने भन्दै बिहीबार राती रौतहटमा प्रहरीले १२ राउण्ड हवाई फायर गर्यो । रौतहट प्रहरीलाई थाहै नदिई प्रदेश डिआईजीको निर्देशनमा बाराबाट प्रहरीको १० जनाको सिभिल टोली मध्यरात राजपुर पुगेको थियो ।

सम्बन्धित जिल्लाको सिडियो र प्रहरी प्रमुखलाई बाराबाट खटिई गएको टोलीबारे जानकारी दिइएको थिएन । प्रहरी टोली सीमाको जंगलको बाटो हुँदै राजपुर गएको हो । छापामार शैलीमा आलमका भाइ महताव आलमलाई पक्रन जादा मध्यरातमा डाँकाहरू आएको भन्दै गाउँलेले होहल्ला गरेपछि आफ्नै ज्यान जोगाउन हवाई फायर खोल्नुपरेको थियो ।

रौतहट प्रहरीलाई टोलीबारे कुनै जानकारी नभएकाले रातको समयमा भएको फायर डाँकाहरूबाटै गराइएको निश्कर्ष सबैले निकाले । त्यतिखेरसम्म बाराको टोली गाउँलेको घेरामा परिसकेको थियो । रौतहट प्रहरीले थाहा पाएपछि मात्र उनीहरू जोगिएका हुन् । नत्र, घटनाक्रमले कैलाली काण्ड दोहोरिने पक्का भइसकेको थियो ।

खुँखार अपराधीको मतियार पक्रन गएको टोलीलाई उल्टै मध्यरातमा रौतहट प्रहरीले उद्दार गर्नुपर्यो । बेलैमा उद्धार नगरेको भए सिभिल टोलीलाई गाउँलेले त्यहिँ धुलोपिठो बनाउने पक्का थियो । रातको समय डाँकाको प्रतिकारमा गाउँले घरेलु हतियारसहित उर्लिएका थिए । समन्वयको अभावमा खोजेको मान्छे फेला परेन,बेकारमा हल्ला मात्र भयो !

आलम रमजान मनाउन भारतबाट घर आएको आशंकामा डिआईजीले उक्त योजना बनाएका थिए । सूचना भरपर्दो नै थियो तर, नेपाल छिरे पनि त्यो रात या त उनी आफ्नै गाउँ गएनन् या गाउँले उरालेर गायब भए। भारतमा बस्ने आलमको नयाँ दिल्लीमा लेदर ब्याग,जुत्ताको कारखाना रहेको बताइन्छ ।