प्रहरी देखेपछि पेस्तोल छोडेर भागाभाग

सप्तरीको राजगढ गाउँपालिका वडा नम्बर २ बाट कटुवा पेस्तोल र गोली बरामद भएको छ ।

सशस्त्र प्रहरी बल,नेपाल सुरक्षा बेस बर्साइनबाट सहायक निरीक्षक तुलसीराम कार्कीको कमाण्डमा खटिएको पाँच जनाको टोलीले एक थान कटुवा पेस्तोल र आठ एमएम गोली बरामद गरेको हो ।

हिजो बनैनिया बोर्डरमा आकस्मिक चेकजाँच गरिरहँदा भारतीय सीमा इलाकाबाट नेपालतर्फ दुई जना अपरिचित व्यक्ति हातमा शंकास्पद वस्तु बोकेर आइरहेको टोलीले बताएको छ ।

उनीहरुले टोलीलाई देख्नेबित्तिकै हातमा भएको शंकास्पद वस्तु फालेर कुलेलम ठोकेका थिए ।

उक्त वस्तु खोजतलास गर्ने क्रममा पेस्तोल र गोली फेला परेको थियो । हाल टोलीले बरामद वस्तु बीओपीमा ल्याएर राखेको छ भने आवश्यक कारबाहीका लागि नेपाल प्रहरीलाई बुझाउने तयारी भइरहेको छ ।