भारतबाट झिकाइएका हतियार सीमा क्षेत्रमा बरामद

बिक्रीका लागि भारतबाट नेपाल ल्याइएका पेस्तोलसहित दुई जना सिमानाकाबाट समातिएका छन् । मोरङको सुनवर्षी नगरपालिका-८ खरेबारी सीमाबाट सशस्त्र प्रहरीको टोलीले दुईवटा पेस्तोलसहित उनीहरुलाई नियन्त्रणमा लिएको हो ।

पक्राउ पर्नेहरुमा सोही नगरपालिकाका २८ वर्षीय आरिफ आलम र उर्लाबारी नगरपालिका-६ का २९ वर्षीय नविन धिमाल रहेका छन् । भारतबाट को.२७ प ४०६ नम्बरको मोटरसाइकलमा विभिन्न पेस्तोल र गोली लिएर नेपाल आउने क्रममा आलमलाई सशस्त्र प्रहरीले पक्राउ गरेको हो ।

उनको साथमा अटोमेटिक चाइनिज पेस्तोल, एक वटा म्याग्जिन तथा एक राउण्ड गोली र एउटा सिक्सर पेस्तोल फेला परेको छ । आलमले उक्त पेस्तोल उर्लाबारी बस्ने धिमालले मगाएको बताएपछि उनलाई समेत नियन्त्रणमा लिएको सशस्त्र प्रहरीले जनाएको छ ।

धिमालको साथबाट ४७ हजार ७ सय ७० नेपाली रुपैयाँ र दुई वटा मोबाइल बरामद गरिएको छ । पक्राउ परेका दुवै जनालाई आवश्यक कारवाहीको लागि आज नेपाल प्रहरीमा बुझाईएको सशस्त्रले जानकारी दिएको छ ।