‘…यसकारण प्रधानमन्त्रीले राजीनामा दिनुपर्छ’

बैठकमा बोल्दै उपाध्यक्ष वामदेव गौतमले एमाले दर्ताको काम प्रधानमन्त्रीको निर्देशनमा भएको प्रमाण आफूसँग भएको बताउनुभयो । गौतमको आरोपलाई पन्छाउँदै अध्यक्ष तथा प्रधानमन्त्री केपी शर्मा ओलीले ‘आफू नेकपाको अध्यक्ष भएकाले त्यस विषयमा केही जानकारी नभएको’ भन्दै मुण्टो फर्काउनुभएको थियो ।

आज बोल्ने सबैजसोले प्रधानमन्त्रीको चर्को आलोचना गरेर राजीनामा मागेपछि प्रधानमन्त्री बैठक चलिरहेको अवस्थामा बाहिरिनु भयो । बैठकको शुरुमै अर्का अध्यक्ष प्रचण्डले पनि प्रधानमन्त्रीको राजीनामा माग्दै ‘अस्तिको अभिव्यक्तिबाट प्रधानमन्त्रीले नैतिक धरातल गुमाई सक्नुभयो । अरुलाई दोष लगाउने प्रयास नगर्नुस् । राजीनामा मैले मागेको हो,अरु कसैले होइन । त्यसैले पार्टी अध्यक्ष र प्रधानमन्त्री दुबै पदबाट राजीनामा दिनुस्’ भन्नुभएको थियो । वहाँले प्रधानमन्त्रीलाई ‘जिम्मेवार पदमा बसेकाले सिँगौरी खेल्ने होइन । कूटनीतिक हिसाबले अघि बढ्नुपर्छ । कुनैपनि छिमेकीको बिरुद्ध परिपक्व अभिव्यक्ति आउनुपर्छ । सरकारको नेतृत्वमा बसेर केटाकेटी खेलेझैँ गर्नु कुनैपनि दृष्टिकोणबाट उचित होइन ।’ भन्ने सुझावसमेत दिनुभयो ।

आज प्रधानमन्त्रीको पक्षमा कुनैपनि सदस्यले बोलेनन् । भोलि फेरि बस्ने भनिएको स्थायी समितिको बैठक अझै केही दिन लम्बिने संकेत देखिएको छ ।