माननीय छान्न तपोवनमा सिकेको बैठक

शुरु मङ्सिर चारको निर्वाचनमा सनसनीपूर्ण नतिजा निकालेर सत्तामा उक्लिने तरखरमा रहेको सिके राउत नेतृत्वको जनमत पार्टीका नेताहरु आन्तरिक छलफलमा जुटेका छन् । निर्वाचनको अन्तिम परिणाम सार्वजनिक नहुँदै मधेसबाट काठमाडौँ उक्लिएर प्रमुख राजनीतिक दलका शीर्ष नेताहरुसँग भेटघाट गरिरहेका अध्यक्ष राउतले आज केन्द्रीय कार्यसमितिको बैठक डाकेका हुन् । 

कोटेश्वरस्थित होटल तपोवनमा केहीबेरअघि बैठक शुरू भएको सो पार्टीका एक नेताले जानकारी दिए । बैठकमा अध्यक्ष राउत, उपाध्यक्षद्वय बसन्त कुशवाह,दिपक साह, महासचिव चन्दन सिंह, लुम्बिनी प्रदेशकी कृषि तथा भूमि व्यवस्था मन्त्री सुमन शर्मा रायमाझी, सिराहाका प्रदेश सांसद सञ्जय यादवलगायत सहभागी छन् । 

बैठकले प्रतिनिधि र प्रदेशसभाको समानुपातिक सांसद चयनसम्बन्धी निर्णय गर्ने बताइएको छ । 

तराई-मधेसलाई छुट्टै राज्य बनाउने भन्दै लामो हिंसात्मक आन्दोलन गरेका राउतले शान्तिपूर्ण राजनीतिमा आएपछिको पहिलो चुनावमै पार्टीलाई सफलता दिलाउन सफल भएका हुन् । प्रत्यक्षमा एक र समानुपातिकमा ५ सीट जितेर जनमत त्रिशंकु संसदमा सत्ताको निर्णायक शक्ति बनेको छ । 

राउत स्वयं शक्तिशाली मन्त्रालय लिएर सरकारमा जाने तयारीका साथ शीर्ष नेताको दैलो चाहारिरहेका छन् ।