रास्ट्रपति चुनावको मौका छोपेर प्रहरीको गुपचुप सरुवा
राष्ट्रपति र उपराष्ट्रपति निर्वाचनको आचारसंहिता लागू भएको मौका छोपेर नेपाल प्रहरीले गुपचूप केही इन्स्पेक्टरको काज सरुवा गरेको छ । आचारसंहिताको कारण फागुन १८ गतेदेखि सरुवा बढुवा रोकिएको बताइएको थियो । तर दुई दिनअघि फागुन १६ गतेको मितिमा इन्स्पेक्टरहरुको काज सरुवाको पत्र बनाएर डिस्प्याच गरिएको तथ्य खुलेको छ ।
फागुन १६ गते गरिएको काज सरुवाको पत्र १० दिनपछि हिजो मात्रै सार्वजनिक गरिनुले पनि गडबडीको आशंकालाई बल मिलेको छ ।
यता काजको लिष्ट हिजो सार्वजनिक भए पनि सरुवा भएका भनिएका इन्स्पेक्टरहरु भने तोकिएको इकाइ र कार्यालयमा हाजिर भइसकेका छन् ।
प्रहरी प्रधान कार्यालय स्रोतका अनुसार हालको नियमानुसार महानिरीक्षक धिरजप्रताप सिंहसहितको एउटा टोली आगामी चैत ११ गते विद्यमान ३० वर्षे सेवा अवधिका कारण घर जाँदैछ । सरुवा भएर जान लागेका हाकिमहरुको स्वार्थमा गुपचुप इन्स्पेक्टरको सरुवा गरिएपछि जिम्मेवारीको पर्खाइमा रहेका उच्च तहका हाकिमहरु नै रुष्ट भएको स्रोतको दाबी छ ।
गत वर्ष चैतमा सरुवा भएका इन्स्पेक्टरहरु सामान्यतया: आगामी चैत लागेपछि मात्रै हुने नयाँ दरबन्दीको निम्ति दौडधुप गर्ने मनस्थितिमा रहेकै बखत भएको ७० जनाको सरुवाले प्रहरी संगठन तरंगित भएको बताइन्छ । उच्च तहका हाकिमहरुको स्वार्थ बाझिँदा एकथरीले आकर्षक ठाउँको जिम्मेवारी पाएका छन् भने अर्काथरी हेरेको हेर्यै भएका छन् ।
प्राप्त विवरणअनुसार फागुन महिनाभित्र प्रहरीले विभिन्न मितिमा ७० जना इन्स्पेक्टरको काज सरुवा गरिसकेको छ । ती सरुवाको पत्रमा मिति सामान्यतयाः एउटै राखिए पनि चलानी र पत्र नम्बर फरक छ । स्रोत भन्छ, ‘ब्याक डेटमा २१ वटा सरुवा १० वटा पत्रको आधारमा गरिएको छ ।’
हालै गरिएको सरुवा अधिकांश आकर्षक युनिटमा भएको पाइन्छ । एकतर्फी काज सरुवाले ती ठाउँ भरिँदा संगठनभित्रै मारामार शुरु हुने गर्दछ । यता,गुपचुप दरबन्दी हाजिर भएका इन्स्पेक्टरहरु भने काज बदर हुने त्रासमा देखिन्छन् । जबकि इन्स्पेक्टरहरुको नियमित सरुवा हुनुपर्ने हरेक वर्षको चैतमा हो ।
ट्रेन्डिङ पोस्ट
टिप्पणीहरू