रास्वपालाई सरकारमा लैजान बालुवाटारमा सल्लाह

राष्ट्रिय स्वतन्त्र पार्टी (रास्वपा) लाई सरकारमा सहभागी गराउने प्रयत्नमा रहनुभएका प्रधानमन्त्री पुष्पकमल दाहाल प्रचण्डले त्यसबारे छलफल गर्न सत्ता गठबन्धनको बैठक राख्नुभएको छ । अहिले प्रधानमन्त्री निवास बालुवाटारमा बैठक बसिरहेको छ । 

जारी बैठक सरकारलाई पूर्णता दिने विषयमा केन्द्रित रहेको बालुवाटार स्रोतले जानकारी दिएको छ । त्यस्तै, सरकारको नीति तथा कार्यक्रम र समसामयिक विषयमा पनि छलफल हुने बताइएको छ । 

बैठकमा प्रधानमन्त्री प्रचण्ड, काँग्रेस सभापति शेरबहादुर देउवा, एकीकृत समाजवादीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव, लोकतान्त्रिक समाजवादी पार्टीका अध्यक्ष महन्थ ठाकुरलगायत शीर्ष नेताको उपस्थिति छ ।  

सरकारमा जान रास्वपा पनि सकारात्मक देखिएको बताइन्छ । त्यसका लागि सभापति रवि लामिछानेले प्रधानमन्त्री प्रचण्ड र काँग्रेस सभापति देउवासँग छुट्टाछुट्टै भेटघाट गरिसकेका छन् । सरकारमा सहभागी हुनुअघि रास्वपाले भ्रष्टाचारको फाइल खोल्ने विषयलाई नीति तथा कार्यक्रममा समावेश गर्नुपर्ने र साविकको मन्त्रालय पाउनुपर्ने अडान राखेको बताइएको छ । 

रास्वपाको उक्त मागप्रति सकारात्मक रहेका प्रधानमन्त्रीले यसबारे कुराकानी गर्न गठबन्धनमा आवद्ध दलका शीर्ष नेताहरुको बैठक राखेको बुझिएको छ । उता सरकारबारे निर्णय गर्न रास्वपाले पर्सि केन्द्रीय समिति र संसदीय दलको संयुक्त बैठक डाकेको छ ।