राप्रपा अध्यक्षलाई भेटेर चिनियाँ कम्युनिष्ट नेताहरु सोझै शीतल निवास

नेपाल भ्रमणमा रहेका चिनियाँ कम्युनिष्ट पार्टी, विदेश विभागका नेताहरुले राष्ट्रपति रामचन्द्र पौडेलका प्रमुख स्वकीय सचिवसँग भेटवार्ता गरेका छन् । 

विदेश विभागका सहायक निर्देशक छु मिन नेतृत्वको चार सदस्यीय टोलीले आज बिहान शीतल निवास पुगेर राष्ट्रपतिका स्वकीय सचिव तथा पूर्वराजदूत डा. सुरेशचन्द्र चालिसेसङ्ग भेट गरेको हो । भेटवार्ताका लागि बिहान ११ बजे शीतल निवास पुगेका चिनियाँ अधिकारीहरु पौने घण्टा कुराकानी गरी बाहिरिएका थिए । 

त्यसअघि चिनियाँ नेताहरुले राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्गदेनलाई पार्टी कार्यालयमै पुगेर भेटेका थिए । बिहान ९ बजे धुम्बाराहीमा भएको आधा घण्टाको भेटवार्तामा विविध राजनीतिक विषयमा कुराकानी भएको बुझिएको छ ।