डेंगु संक्रमण रोक्न चित्रकला प्रतियोगिता, परामर्शका लागि हटलाइन नम्बर

काठमाडौं महानगरपालिकाले डेंगु संक्रमणको सम्भावित महामारी रोकथाम तथा नियन्त्रणका लागि लार्भा नष्ट गर्ने अभियान थालेको छ । महानगरपालिकाले सबै वडामा यो अभियान शुरु गरेको हो । 

सो क्रममा आज महानगरपालिकाले पानी जमेका ठाउँमा लार्भा नष्ट गर्ने, सर्वसाधारणलाई रोगका विषयमा जानकारी दिने, सरसफाइ गर्ने, सफा गरिएको ठाउँमा चुना छर्किनेलगायतका काम गरेको छ । त्यस्तै, माइकिङ गरेर रोग नियन्त्रणका लागि सहभागिता जनाउन सम्पूर्ण महानगरबासीमा आह्वानसमेत गरेको छ ।

वर्खायाममा लामखुट्टेको टोकाइबाट बच्न अत्यन्तै आवश्यक रहेको महानगरपालिकाको स्वास्थ्य विभाग प्रमुख रामप्रसाद पौडेलले बताए । 

‘वर्खायाममा संक्रमित लामखुट्टेको टोकाइबाट सर्ने डेंगु रोगबाट बच्ने सबैभन्दा उत्तम उपाय एडिस जातका लामखुट्टेको टोकाइबाट बच्नु हो । यस्ता लामखुट्टेलाई फैलिन दिनुहुँदैन् । कुनै पनि ठाउँमा पानी जम्न दिनुहुँदैन् । सफा पानीमा बस्ने यो जातको लामखुट्टेको बासस्थान नै नाश गरिदिनुपर्छ’, उनले भने । 

महानगरपालिकाले डेंगुसम्बन्धी सचेतना जगाउनका लागि सरकारी तथा संस्थागत विद्यालयमा चित्रकला प्रतियोगिता गर्ने निर्णय गरेको छ । विद्यार्थीमार्फत अभिभावकसम्म संक्रमणका बारेमा चेतना फैलाउन विद्यालयस्तरीय कार्यक्रम गर्न लागिएको हो । 

प्रतियोगिताका लागि विद्यालयहरुले आन्तरिक प्रतिस्पर्धा गराएर एकजना विद्यार्थी स्रोत केन्द्रमा पठाउनुपर्छ । स्रोत केन्द्रमार्फत छनोट भएका विद्यार्थीका लागि भदौ १ गते महानगरस्तरीय प्रतियोगिताको आयोजना गरिएको छ । 

त्यस्तै, महानगरपालिकाले टेलिफोनमार्फत डेंगु रोगको परामर्श लिने व्यवस्थासमेत मिलाएको छ । हटलाइन नम्बर ११८० मा सम्पर्क गरेर परामर्श लिन सकिनेछ । साथै, १०२ मा सम्पर्क गरेर निःशुल्क एम्बुलेन्स प्रयोग गर्न सकिने महानगरपालिकाले जनाएको छ ।