विद्यालयका शिक्षक–कर्मचारीले थाले चरणबद्ध आन्दोलन, माग सुनुवाई नभए काठमाडौंमा बृहत प्रदर्शन गर्ने

नेपाल शिक्षक महासंघले चरणबद्ध आन्दोलन थाल्ने भएको छ । सरकारले आफ्ना माग सम्बोधनमा आलटाल गरेको भन्दै महासंघले गत साउन २८ गतेदेखि देशव्यापी आन्दोलन थाल्ने घोषणा गरेको हो । 

‘विद्यालय शिक्षा ऐन, २०८०’ को मस्यौदामा रहेका केही दफा शिक्षक–कर्मचारीको पेशागत सुरक्षा र स्वाभिमानविरुद्ध रहेको जनाउँदै आन्दोलनमा जाने निर्णयमा पुगेको महासंघको भनाइ छ । मस्यौदामा शिक्षा, विज्ञान तथा प्रविधि मन्त्रालयसँग भएका ३० बुँदे र ५१ बुँदे सहमति उचित ढंगबाट नसमेटिएको महासंघले ठहर गरेको छ । 

स्थायी, अस्थायी–करार, राहत, साविक उमावि, बालकक्षा, विशेष शिक्षा, शिक्षण सिकाइ अनुदान, प्राविधिक धार, संस्थागत विद्यालयका शिक्षकका माग पनि सम्बोधन गरिएको महासंघको गुनासो छ । 

वि.सं २०७५ साल र त्यसपछि स्थायी भएका शिक्षकलाई पुरानै प्रणालीबाट पेन्सन दिनुपर्ने विषय पनि मस्यौदामा उल्लेख नभएको महासंघले जनाएको छ । महासंघले आज सबै जिल्लाको शिक्षा विकास तथा समन्वय एकाइ प्रमुखलाई सरकारले गरेको सम्झौताबारे जानकारी गराएको छ । त्यस्तै, महासंघले २ बजेसम्म एकाइ कार्यालयमा धर्ना दिने भएको छ । 

साउन ३२ गते सात वटै प्रदेशको सामाजिक विकास मन्त्रालयमा तीन घण्टा धर्ना दिने र भदौ १ गते संघीय तथा प्रदेश सांसद्सँग आफ्ना माग सम्बोधनका लागि आग्रह गर्ने भनिएको छ । त्यति गर्दा पनि माग सम्बोधन नभएमा काठमाडौंमा बृहत विरोध प्रदर्शन गर्ने महासंघले चेतावनी दिएको छ ।