सिंहदरबार जलाइदिने बालेनको धम्कीप्रति मानव आधिकार आयोग चिन्तित

मुलुकको जिम्मेवार पदमा रहेका व्यक्तिबाट अभिव्यक्त धारणा, आरोपप्रत्यारोप तथा आपराधिक घटनालाई लिएर राष्ट्रिय मानव अधिकार आयोगले चिन्ता जनाएको छ । 

आयोगले काठमाडौंका मेयर बालेन्द्र शाहले सामाजिक सञ्जालमार्फत 'सिंहदरबारमा आगो लगाइदिन्छु' भनी लेखेको तथा स्वास्थ्यमन्त्री मोहनबहादुर बस्नेतले 'कर्मचारीलाई आत्महत्या गर्ने भए डोरी किनिदिन्छु' भनेकोप्रति चिन्ता व्यक्त गरेको हो । त्यस्तै, नेपाली कांग्रेसका सहमहामन्त्री महेन्द्र यादवमाथि काठमाडौंमा सांघातिक आक्रमण भएको घटनालाई पनि आयोगले ध्यानाकर्षण गरेको जनाएको छ । 

जसपाका जिल्ला अध्यक्ष राजकुमार यादवमाथि प्रहरीबाट मोरङमा भएको दुर्व्यवहार तथा हेटौँडामा कार्यक्षेत्रमै चिकित्सक कुटिएको घटनाले चिन्तित बनाएको आयोगले बताएको छ । ताप्लेजुङमा कोशी प्रदेशसभा सदस्य खगेन सिंहाङ्गामले सुरक्षा निकायका प्रमुखलाई सार्वजनिक स्थलबाटै धम्की दिएकोलगायतका अन्य घटनाहरु पनि जानकारीमा आएको आयोगले जनाएको छ । 

आयोगका महासचिव एंव प्रवक्ता टीकाराम पोखरेलले आज विज्ञप्ति सार्वजनिक गर्दै यस्ता आपराधिक र अराजक गतिविधिले अराजकतालाई प्रश्रय दिएको बताए । यस्ता घटनाले शान्तिसुरक्षामा समेत आँच पुग्न गई राज्य संयन्त्रप्रति नै अविश्वास पैदा भएको विज्ञप्तिमा जनाइएको छ । 

नेपालको संविधान र मानव अधिकारसम्बन्धी अन्तर्राष्ट्रिय कानूनहरुले अभिव्यक्ति तथा विचारको स्वतन्त्रताको प्रत्याभूति गरेको भएतापनि अरुको मर्यादा र शान्ति सुरक्षामा आँच पुग्नसक्ने विषयलाई विशुद्ध विचार र अभिव्यक्ति स्वतन्त्रताको मात्र विषय मान्न नसकिने आयोगको भनाई छ । 

आफ्नो अधिकारको प्रयोग गर्दा अरुको अधिकारमा पर्नसक्ने असरप्रति जिम्मेवार व्यक्तिले ध्यान पुर्याउनुपर्ने उल्लेख गर्दै आयोगले यसप्रकारका आपराधिक तथा अराजक गतिविधिमा संलग्न आरोपितलाई कानूनबमोजिम कारबाही गर्न माग गरेको छ । 

साथै, नेपालको संविधान, कानून र अन्तर्राष्ट्रिय मानव अधिकार कानूनविपरीत हिंसात्मक गतिविधि नगर्न, घृणाजन्य अभिव्यक्ति नदिन तथा सामाजिक सञ्जालको प्रयोग गर्दा शिष्ट र मर्यादित भएर एकअर्काप्रति मानव अधिकारमैत्री भाषा र व्यवहार प्रयोग गर्नसमेत अनुरोध गरिएको छ ।