कार्ड सकिएपछि स्मार्ट लाइसेन्सको छपाइ रोकियो
यातायात व्यवस्था विभागले स्मार्ट लाइसेन्सको छपाइ रोकेको छ । कार्ड सकिएपछि विभागले आकस्मिकबाहेकको छपाइ रोकेको हो ।
गत एक महिनादेखि स्मार्ट लाइसेन्सको छपाइ ठप्प भएको विभागले जनाएको छ । कार्ड खरिदका लागि प्रक्रिया अघि बढाइसकेको विभागका सूचना अधिकारी ईश्वरीदत्त पनेरुले बताए । केही दिनमै कार्ड आउने र छपाइ थालिने उनले जानकारी दिए ।
‘विभागले अहिले आकस्मिकबाहेकको छपाइ रोकेको छ । थप कार्ड खरिदका लागि प्रक्रिया अघि बढिसकेको छ । कार्ड आउनेबित्तिकै छपाइ थाल्छौं’, उनले भने ।
नियमित रुपमा हुने छपाइ रोकिएपछि विभागलाई चाप परेको छ । छाप्नुपर्ने लाइसेन्सको संख्या बढिरहेको छ । पहिलो चरणमा ६ लाख कार्ड आउन लागेको विभागले जनाएको छ ।
चालकलाई सहज बनाउन भनि शुरु गरिएको स्मार्ट लाइसेन्सबारे सेवाग्राहीहरुको व्यापक गुनासो छ । कहिले मेसिन बिग्रिएर त कहिले कार्ड सकिएर सेवाग्राहीले दुःख पाउँदै आएका छन् ।
स्मार्ट लाइसेन्स लागू गरेको लामो समय बितिसक्दासमेत सरकारले सेवालाई प्रभावकारी बनाउन नसकेको सेवाग्राहीहरुको गुनासो छ ।
टिप्पणीहरू