पीडामाथि पीडा बल्झाउने परराष्ट्रको ‘त्यो’ संवेदनाहीन विज्ञप्ति

इजरायल–प्यालेष्टाइन युद्धको चपेटामा परी जीवन मरणको दोसाँधमा रहेका नेपाली विद्यार्थीले उद्धारको अपिल गर्दै उताबाट नेपाल सरकारलाई भिडिओ सन्देश र पत्र लेखिरहेका छन् । नेपाल फर्किने वातावरण बनाइदिन तारन्तार आग्रह भइरहेको छ । काश्कीको अन्नपूर्ण गाउँपालिका–२ घर भई हाल इजरायलमा फसेका विद्यार्थी सुरज भण्डारीले सोमबार प्रधानमन्त्री पुष्पकमल दाहाल प्रचण्डका नाममा पत्र लेख्दै नेपाल फर्किने वातावरण बनाइदिन आग्रहसहित भावुक सन्देश पठाए । ‘अबको हाम्रो आशा पनि तपाईंं नै हो, भरोसा पनि तपाईंं नै हो । यो दुई देशको चपेटामा परेर ज्यान गुमाउन मन छैन ।

हामीलाई देश आउने वातावरण मिलाइदिनुहोस्, हामी देशमै रमाउनेछौं,’ उनको सन्देशमा भनिएको छ । सरकारले उद्धार गर्छ भन्ने विश्वासमा आफूहरूको ‘सास रोकिएको’ भन्ने शब्द सन्देशले जो–कसैको हृदय पोल्छ । इजरायलबाट विद्यार्थीले तत्काल उद्धार गरिदिन आग्रह गरिरहेका छन् । हमासको निसानामा परी सुदूरपश्चिम विश्वविद्यालयबाट गएका १० जनाको ज्यान गएको पुष्टि भइसकेको छ । केही घाइते भएका छन् । इजरायलमा खासगरी अध्ययनका लागि पुगेका विद्यार्थी युद्धको चपेटामा छन् । दुर्भाग्य, यता दश जना नेपाली नागरिकको बिदेशी भूमिमा हत्या हुँदासमेत सरकार एउटा सामान्य शिष्टाचारसमेत देखाउन सक्दैन ।

परराष्ट्र मन्त्रालयले आइतबार पहिलोपल्ट जारी गरेको ‘प्रेस विज्ञप्ति’ बाट यो हदको लाचारी देखिएको छ । मुलुक अत्यन्त शोकमा परेका बेला इजरायल घटनाबारे जानकारी दिन भनेर जारी भएको विज्ञप्तिमा घटनालाई हल्काफुल्का ढंगले लिएको प्रतीत हुन्छ । त्यो प्रेस विज्ञप्तिमा परराष्ट्रले नेपाली राजदूतावास तेल अभिभ, इजरायलबाट प्राप्त पछिल्लो जानकारीअनुसार इजरायलको गाजासँगको सीमालगायत क्षेत्रमा भएको पछिल्लो आक्रमणमा परी १० जना नेपाली नागरिकले ज्यान गुमाएका, एक जना सम्पर्कविहीन रहेका र केही घाइते अवस्थामा रहेको भन्ने छ । शव पहिचान गर्ने कार्य अन्तिम चरणमा रहेको पनि जनाइएको छ । द्वन्द्वग्रस्त क्षेत्रबाट नेपालीको यथाशीघ्र उद्धार गर्न नेपाल सरकार पूर्णरूपमा प्रतिबद्ध रहेको भनिएको छ। तर यति दुःखद घटनालाई लिएर प्रेस नोटमा कतै मृतक विद्यार्थीका लागि दुई शब्द श्रद्धाञ्जली, परिवारका लागि सहानुभूति र घाइतेप्रति स्वास्थ्यलाभको कामनासम्म भेटिँदैन ।

परराष्ट्रले औपचारिकता निभाउने शैलीमा लेखेको छ, ‘सरकारले आतंकवादी हमलाको निन्दा गर्दै इजरायल सरकारप्रति ऐक्यबद्धता जनाएको छ । साथै, सरकारले हमलामा अमूल्य जीवन गुमेकोमा तथा धेरै मानिस घाइते भएकोमा दुःख व्यक्त गरेको छ ।’ यो विज्ञप्तिमा नेपाल सरकारको कुनै जिम्मेवारी र जवाफदेहिता पनि झल्कँदैन । विज्ञप्तिको भाषा हेर्दा यस्तो लाग्छ, मानौँ आफ्नो ज्यान जोगाउने जिम्मा आफ्नै हो । परराष्ट्रले झारा टार्न खोजेको आभाष जो–कसैलाई दिलाउँछ । कतै सान्त्वनाका दुई शब्द पाइँदैन ।

परराष्ट्रले गोश्वारा ढंगले भनेको छ, ‘इजरायलमा विकसित पछिल्लो घटनाक्रमका सम्बन्धमा तेल अभिभस्थित नेपाली राजदूतावास र परराष्ट्र मन्त्रालयका अधिकारीहरूको सम्पर्क विवरण उपलब्ध गराइएकाले उहाँहरूमार्फत आवश्यक जानकारी लिन र सम्पर्कमा रहनुहुन अनुरोध छ । यस कठिन परिस्थितिमा इजरायलमा रहेका सम्पूर्ण नेपालीलाई सजगता अपनाउन र नेपाली राजदूतावाससँग सम्पर्कमा रहन परराष्ट्र मन्त्रालय सम्बन्धित सबैमा हार्दिक अनुरोध गर्दछ ।’