भारतीय सेना प्रमुख बिहानै मुक्तिनाथ जाँदै

नेपाल भ्रमणमा रहेका भारतीय स्थल सेनाध्यक्ष उपेन्द्र द्विवेदी भोलि बिहान मुक्तिनाथ जाँदै छन् । उनी बिहान साढे ७ बजे काठमाडौंबाट नेपाली सेनाको कल साइन एनए ०५८ अगुस्ता हेलिकोप्टरमा मुक्तिनाथ गएर फर्कंदा पोखरामा ओर्लने कार्यक्रम छ ।

पोखरामा अवतरण गरेर विजयपुर ब्यारेकको भ्रमणपछि काठमाडौं फर्कने र सेनाध्यक्षको प्रतिनिधिमण्डल सवार अर्को हेलिकोप्टर एनए ०५५ पनि मुक्तिनाथ दर्शनपछि पोखरामै रोकिने प्राप्त सूचनामा जनाइएको छ । 

सेनाध्यक्ष द्विवेदीको भ्रमणमा कुनै कसर र असर नपरोस् भन्ने उद्देश्यले एउटा हेलिकोप्टर र एउटा स्काई ट्रकलाई पोखरामा स्टाण्डबाई राख्ने प्रबन्ध मिलाएको बताइन्छ ।