युएईका लगानीकर्तालाई नेपालमा लगानी गर्न महासंघ अध्यक्षको आह्वान

नेपाल उद्योग वाणिज्य महासंघका अध्यक्ष चन्द्रप्रसाद ढकालले संयुक्त अरब इमिरेट्स (युएई) का लगानीकर्ताहरुलाई नेपालमा लगानीका अवसरहरुबाट लाभ लिन आह्वान गरेका छन् ।

दुबइमा हिजोदेखि सुरु भएको संयुक्त राष्ट्रसंघीय जलवायु सम्मेलनका अवसरमा आयोजित ‘नेपाल युएई बिजनेस फोरम’ लाई हिजो साँझ सम्बोधन गर्दै उनले नेपालमा लगानीका सम्भावना प्रशस्त रहेको उल्लेख गरे । उनले भने,‘ नेपाल लगानीको वातावरण बनेको छ । अर्थतन्त्रमा देखिएको सुधारले लगानीकर्ताहरूलाई नयाँ अवसरहरू सिर्जना पनि भएको छ ।’

अध्यक्ष ढकालले ऊर्जा, पर्यटन, कृषि प्रशोधन र आइसिटी गरी चार क्षेत्रमा लगानीको आकर्षण रहेको उल्लेख गरे । आफ्नै आन्तरिक बजार तथा  भारत र बंगलादेशका क्षेत्रीय बजारमा ऊर्जाको माग बढिरहेकाले नेपालको जलविद्युत गरिने लगानीले उच्च प्रतिफल दिने अध्यक्ष ढकालको भनाई छ ।

थप पर्यटकलाई स्वागत गर्न नेपालमा नयाँ अन्तर्राष्ट्रिय विमानस्थलहरू सञ्चालनमा आएको र निजी क्षेत्रले बिलासी होटल तथा रिसोर्टहरूमा लगानी बढाएको जानकारी पनि दिए । अध्यक्ष ढकालले युएईका लगानीकर्ताहरूलाई होटल, केबुलकार, थिम पार्क र हिल स्टेसन लगायतका पर्यटन पूर्वाधारमा लगानी साझेदारीका लागिसमेत आग्रह गर्नुभयो ।

नेपालको उच्च हिमाली क्षेत्रका कृषि उत्पादन तथा जडीबुटीको विश्व बजारमा माग छ । कृषि प्रशोधनमा समेत लगानीका थप अवसर रहेकोतर्फ युएईका लगानीकर्ताहरूको ध्यानाकर्षण गराइएको छ ।

कडा परिश्रम र इमानदारिताका लागि नेपाली श्रम शक्ति परिचित रहेकोतर्फ ध्यानाकर्षण गराउँदै अध्यक्ष ढकालले श्रमिकहरूलाई थप दक्ष बनाउन प्राविधिक तथा व्यावसायिक जनशक्ति विकासमा समेत नेपालमा लगानी गर्न सकिने नयाँ धारणा राखेका छन् ।

दुई मुलुकबीचको आर्थिक सम्बन्धलाई मजबुत बनाउन र सबै तहमा सहकार्य गर्न नेपाल उद्योग वाणिज्य महासंघ तत्पर रहेको पनि अध्यक्ष ढकालले जानकारी दिए । प्रधानमन्त्री पुष्पकमल दाहाल ‘प्रचण्ड’ ले उद्घाटन गर्नुभएको नेपाल युएई बिजनेस फोरममा दुबै मुलुकका लगानीकर्ताहरूको उपस्थिति थियो ।