फाराम भरेका सबैलाई तुरुन्त लाइसेन्स दिन प्रधानमन्त्रीको निर्देशन

प्रधानमन्त्री पुष्पकमल दाहाल प्रचण्डले फाराम भरेर परीक्षासमेत उत्तीर्ण गरेका सेवाग्राहीलाई तुरून्तै लाइसेन्स दिने व्यवस्था मिलाउन निर्देशन दिनुभएको छ ।

आज दिउँसो प्रधानमन्त्रीको कार्यकक्ष सिंहदरबारमा सवारी चालक अनुमतिपत्र, राष्ट्रिय परिचयपत्र र राहदानीसँग सम्बन्धित विषयमा भएको एकीकृत छलफलमा प्रधानमन्त्रीले सरकारको सम्बन्धित निकायलाई उक्त निर्देशन दिनुभएको हो । १४ लाख सेवाग्राहीले लाइसेन्स परीक्षा उत्तीर्ण गरिसक्दा पनि लाइसेन्स नपाउनु गम्भीर चिन्ताको विषय भएको उहाँको भनाई छ। 

१४ लाख युवाले फाराम भरेर पनि लाइसेन्स पाएका छैनन् । उनीहरूलाई लाइसेन्स दिने काम तपाईहरूको हो । त्यसका लागि नीति र बजेटमा अभाव भए त्यसको समाधान म खोज्छु' प्रधानमन्त्रीले निर्देशन दिँदै भन्नुभयो, 'काम तपाईहरूले नगर्ने गाली चाहिँ मैले खाने भइरहेको छ । लाइसेन्स नपाएका युवाले सरकार खत्तम देख्छन् । प्रधानमन्त्रीको आलोचना गर्छन् । तर, काम नगरेको प्रधानमन्त्रीले होइन, विभागले हो भन्ने बुझ्दैनन् । त्यो बुझ्ने कुरा पनि भएन नि । लाइसेन्स पाउने उनीहरूको अधिकार हो । यसमा लापरवाही नगर्नुस् ।'

आफू प्रधानमन्त्री भएलगत्तै सेवा प्रदायक कार्यालयका लामालामा लाइन हटाउने प्रतिवद्धता गरेको स्मरण गराउंदै उहाँले अपेक्षाकृत नतिजा नआएको गुनासो पनि गर्नुभयो । 'एक वर्षको अवधिमा देखिने गरी सुधार त भएको छ । तर, पूरै सुधार भएको छैन', प्रधानमन्त्री प्रचण्डले भन्नुभयो, 'त्यसमा गम्भीर रूपमा ध्यान दिनुस् । विभाग र सेवाप्रदायक कार्यालयहरूको कार्यक्षमता बढाउनुस् ।'

त्यसक्रममा उहाँले आफ्नै सोर्सकोड र सफ्टवेयर कहिले हुन्छ ? भनेर प्रश्न पनि गर्नुभएको थियो । 'स–साना प्राविधिक समस्या सुल्झाउन पनि विदेशीहरू नै बोलाउनुपर्ने स्थिति छ । रातरात सबै कुरा परिवर्तन सकिँदैन, योजनावद्ध काम गर्दा क्रमशः बदल्न सकिन्छ । इञ्जिनियरहरू आफै पढाउनुपर्छ । आफै तालिम दिनुपर्छ । देशलाई आवश्यक पर्ने जनशक्ति योजनावद्ध तरिकाले उत्पादन गर्नुपर्छ । यसमा हामीले गम्भीर भएर सोचौँ र योजना बनाऔँ', प्रधानमन्त्रीको भनाई छ ।