बाढीपहिरोबाट मृत्यु हुनेको संख्या १०४ पुग्यो,लामो यात्रामा ननिस्कन अनुरोध

अविरल वर्षाका कारण आएको बाढी–पहिरोबाट देशभरका विभिन्न स्थानमा मृत्यु हुनेको संख्या एक सय चार पुगेको छ । 

नेपाल प्रहरीका अनुसार शुक्रबारदेखि आज बिहानसम्म काठमाडौं उपत्यकासँगै विभिन्न जिल्लामा बाढीपहिरो र डुबानबाट एक सय चार जनाको निधन भएको छ । 

त्यस्तै, ६४ जना बेपत्ता भएको प्रहरीले जनाएको छ । बाढीपहिरो र डुबानमा परी ७३ जना घाइते भएका छन् । अहिलेसम्म तीन हजार ३५ जनाभन्दा बढीको उद्दार गरिएको प्रहरीले जनाएको छ । 

प्रहरीका अनुसार अविरल वर्षाका कारण मुलुकका विभिन्न स्थानमा आएको बाढीपहिरोका कारण अवरुद्ध भएको सडक खुलाउने प्रयास भइरहेको छ । बाटो खुलाउने प्रयास भइरहेको हुँदा लामो यात्रामा ननिस्कन आग्रह गरिएको छ । 

कतै निस्कनु परेमा सम्बन्धित जिल्ला प्रहरी कार्यालय अथवा प्रहरीको १०० मा सम्पर्क गरी बाटोको अवस्थाबारे बुझ्न प्रहरीको अनुरोध छ ।