मन्त्री सवार हेलिकोप्टर चौतारामा, विकट बस्तीमा पीडितहरुको बेहाल

असोज १२ गतेको पहिरोमा पुरिएर सिन्धुपाल्चोक जिल्लाको विकट जुगल गाउँपालिका– कुनेगाउँका दुई जना हालसम्म बेपत्ता छन् । पहिरोले चार जना बगाएकोमा १७ गते दुई जनाको शव फेला परेको छ, बाँकी भेटिएका छैनन् । 

सोही दिन भोटेकोसीमा आएको बाढीले भोटेकोसी गाउँपालिकास्थित लार्चामा रहेको बेलिब्रिज र कोदारीको पक्की पुल बगायो । यसबाट दशैँको मुखमा स्थानीयले नसोचेको सकस झेल्नुपरेको छ । 

चीनसँगको नाका जोड्ने दुई वटा पुल बगाएकै कारण सडक अवरुद्ध हुँदा चाडपर्वलक्षित नौ सयभन्दा बढी मालबाहक कन्टेनर अलपत्र छन् । केही कन्टेनर नेपाली भूमिमा र कतिपय चिनियाँ भूभागमा रोकिएको अवस्था छ ।

बाढी, पहिरो र डुबानले मुलुकभर झण्डै साढे दुई सयले ज्यान गुमाएका छन् भने कयौँ बेपत्ता छन् । अर्बौँको भौतिक सम्पत्तिको क्षति गरेको छ । सरकारले काठमाडौँ उपत्यकासहित १२ जिल्लाका ४३ स्थानीय तहलाई विपत् संकटग्रस्त क्षेत्र घोषणा गरेको छ । तीमध्ये बाढी पहिरोबाट बढी धनजनको क्षति भएको जिल्लामध्ये सिन्धुपाल्चोक एक हो । 
तर, प्राकृतिक प्रकोपको चपेटामा परेको सिन्धुपाल्चोकका प्रभावित क्षेत्रको स्थलगत अवलोकनका लागि हेलिकोप्टर लिएर आज गएको सरकारी टोली परैबाट फर्किएको छ । पहिरोले ध्वस्त गाउँबस्ती निरीक्षण गर्न पुगेको गृहमन्त्री रमेश लेखकसहितको जम्बो टोली सदरमुकाम चौताराबाटै फर्किएको हो । 

टोलीमा गृहमन्त्री लेखक, रक्षामन्त्री मानवीर राई, भौतिक यातायातमन्त्री देवेन्द्र दाहाल, प्रधानसेनापति लगायत सहभागी थिए । तर, न पहिरोमा परी पाँचजनाको ज्यान गएको लिसंखुपाखर पुगे । न कुनेगाउँ जाने चासो देखाए ! पुल बगाएर आक्रान्त बनेको भोटेकोसीसम्म पनि गएनन् । 

हेलिकोप्टर सदरमुकाम चौतारामा बिसाएर त्यतै रोकिएको सरकारी टोली जिल्ला विपत् व्यवस्थापन समितिले राखेको बैठक सम्बोधन गरेर फर्कियो ।

काठमाडौँ फर्कनुअघि गृहमन्त्री लेखकले बैठकमा सम्बोधन गर्दै बेपत्ताको खोजीमा सरकार गम्भीर भएर लागिपरेको बताए । चौतारा पुगेर दुई जना नागरिक बेपत्ता भएको कुनेगाउँ टेक्ने जाँगरसम्म नदेखाएका उनले सरकार सक्रिय रहेको भाषण गरेका थिए ।

बेलिब्रिज बगाएपछि भोटेकासीबासीको जनजीवन बेहाल भएको छ । तर, भौतिक यातायातमान्त्री दाहालले भारतले २० वटा बेलिब्रिज दिन लागेकाले प्राथमिकताको आधारमा बाँड्ने भन्दै बेमौसमी गफ छाँटे । रक्षामन्त्री राईले विपत्मा सेनाले राम्रो काम गरेकोमा प्रशंसा गरे ।

प्राकृतिक प्रकोपले वर्षेनी आक्रान्त सिन्धुपाल्चोकमा गाउँबस्ती डुबिसकेपछि, घरखेत बगाएर विल्लिबाँठ भइसकेपछि भिआपीहरुको बेअर्थी लर्को लाग्ने गरेको यो पहिलो पटक होइन । यसअघि पनि विपदग्रस्त क्षेत्रको निरीक्षणका नाममा भीआइपीहरु हेलिकोप्टरमा घुम्ने गरेकै हुन् । तर, निरीक्षणका नाममा हुने त्यस्ता भ्रमण उपलब्धिमूलक नहुँदा पीडितले थप पीडा महशुस गर्ने गरेको बुझाई स्थानीयको छ । 

यता, बाढीपहिरो गएको १० दिनपछि विपदग्रस्त क्षेत्र निरीक्षण भन्दै  सिन्धुपाल्चोक आइपुगेका भीआइपी टोलीसँग स्थानीय राजनीतिक दलका नेताहरुले रोष प्रकट गरेका छन् । नेकपा माओवादी केन्द्रका जिल्ला संयोजक गोविन्द पराजुलीले यत्रो दिनसम्म निरीक्षणमा नआएको भन्दै गृहमन्त्रीप्रति आक्रोश जनाए । 

राजनीतिक दलका प्रतिनिधि र जनप्रतिनिधिहरुले सिंगो जिल्लालाई नै विपदग्रस्त क्षेत्र घोषणा गर्न माग गरे पनि गृहमन्त्री लेखकले भने त्यसो गर्न नमिल्ने बताएका छन् । जिल्लालाई विपदग्रस्त क्षेत्र तोक्न नमिल्ने भन्दै उनले कुन पालिकालाई घोषणा गर्नु पर्ने हो छानेर सिफारिस पठाउन आग्रह गरे ।

असोज १२ गतेको बाढी र पहिरोमा परी सिन्धुपाल्चोकमा १० जनाले ज्यान गुमाउनका साथै दुई जना बेपत्ता भएको सरकारी तथ्याङ्कमा उल्लेख छ । बाढी पहिरोले जिल्लाको मुख्य सडकका विभिन्न ४८ ठाउँ अवरुद्ध र भित्री सडकहरु अधिकाँश ठप्प थिए । अधिकाँश ठाउँमा पहिरो पन्छाइएकाले अहिले यातायात सुचारु भएको छ । 

तर, दुइवटा पुल बगाएका कारण भोटेकोसी गाउँपालिका मात्र नभएर चीनसँगको तातोपानी नाकासमेत पूर्णरुपमा प्रभावित छ ।