२५ तले भवन माथि होटल,तल भाटभटेनी स्टोर

दरबारमार्गस्थित अन्नपूर्ण होटल परिसरमा भाटभटेनी स्टोर सञ्चालन हुने भएको छ । उक्त स्थानमा बन्न लागेको २५ तले भवनको भुईं तल्लामा स्टोर रहनेछ ।

अन्नपूर्ण स्क्वायर होटल नाम दिइएको भवन २०८५ वैशाखदेखि सञ्चालनमा आउने छ । भाटभटेनी सुपरमार्केट समूहले होटलमा लगानी बढाउन थालेको छ । यसमा लिटिल एन्जल्स र अन्नपूर्ण समूहको समेत लगानी हुने जानकारी दिइएको छ ।

भाटभटेनी सुपर मार्केटका अध्यक्ष मीनबहादुर गुरुङले हिजो शिलान्यास (जग पूजा) गरेका छन् । २५ तले भवन डिजाइन भारतीय आर्किटेक्चर कम्पनीले गरेको र ४० कोठाको सुविधा सम्पन्न अपार्टमेन्ट हुने बताइएको छ ।

छ अर्ब रुपैयाँ लगानी हुने होटल तथा भवनमा क्यासिनोलगायत अत्याधुनिक सुविधा हुने छ । मीनबहादुरले डेढ महिनाअघि कीर्तिपुर नजिकै एमाले मुख्यालय प्रधानमन्त्री तथा एमाले अध्यक्ष केपी शर्मा ओलीसँगै शिलान्यास गरेका थिए । एमालेलाई प्रदान गरिएको उक्त भवन निर्माणको १० रोपनी जग्गा विवादमा परेपछि अदालतमा विचाराधीन छ ।