दिवंगत पूर्व मेयरलाई घरमै श्रद्धाञ्जली

काठमाडौं महानगरपालिकाका पूर्व मेयर प्रेमलाल (पिएल) सिंहको निधन भएको छ । ८८ वर्षीय सिंहको ठमेल चाक्सीबारीस्थित निवासमा गएराति १ बजे निधन भएको हो ।

उहाँको शव बिहान ११ बजेसम्म घरमै श्रद्धाञ्जलीका लागि राखिएको छ । मध्यान्हपछि स्वयम्भू, डल्लुमा दाहसंस्कार गरिने पारिवारिक स्रोतले जनाएको छ । लामो समयदेखि अस्वस्थ सिंहको गत वर्ष पेटको शल्यक्रिया गरिएको थियो ।

उहाँ २०४९ सालमा नेपाली काँग्रेसबाट काठमाडौं नगरपालिकाको मेयर निर्वाचित हुनुभएको थियो । सिंहले नै २०५२ साल मंसिर २९ गते काठमाडौं नगरपालिकालाई महानगरपालिका घोषणा गर्नुभएको हो । 

आज काठमाडौं महानगरपालिका र मातहतका कार्यालयहरूमा शोक बिदा दिइएको छ ।