गोकर्ण रिसोर्ट र धापासीमा आगलागी

राजधानीका धापासी र गोकर्ण रिसोर्टमा एउटै समयमा आगलागी भएको छ । टोखा नगरपालिका– ६, धापासीस्थित भाइकाजी श्रेष्ठको साढे तीनतले घरमा हिटर ताप्ने क्रममा आगलागी भएको बताइएको छ ।

हिजो साँझ भएको भीषण आगलागी करिब दुई घण्टाको प्रयासपछि नियन्त्रणमा आएको थियो । आगो नियन्त्रणमा लिन आठ वटा दमकल प्रयोग गरिएको थियो ।

आगलागीमा मानवीय क्षति नभए पनि घरभित्रका सबै सामान जलेर नष्ट भएको छ । प्रहरीका अनुसार ग्यास हिटर बाल्ने क्रममा आगलागी भएको हो । उक्त घर नेपाल राष्ट्र बैंकका पूर्व निर्देशक तथा माछापुच्छ्े बैंकका भूतपूर्व प्रमुख कार्यकारी अधिकृत भाइकाजी श्रेष्ठको भएको बैंकका कर्मचारीहरुले सामाजिक सञ्जालमा लेखेका छन् । 

हिजै साँझ गोकर्ण रिसोर्टभित्रको एउटा क्यान्टिनमा पनि आगलागी भएको छ । रिसोर्टका कर्मचारीलाई खाना र खाजा खुवाउने राजु भुजेलको क्यान्टिनमा सवा ८ बजे आगो लागेको हो ।

नेपाल प्रहरी, रिसोर्टका कर्मचारी, महानगरपालिकाको दमकल र सेनाको विपद व्यवस्थापन गण सुन्दरीजलको टोली र दमकलले आगो निभाएको थियो ।