सहकारी पीडितको नेतृत्व गरिरहेका कुशलवमाथि बज्रपात

सहकारी पीडित बचतकर्ताको बचत फिर्ताका लागि झण्डै दुई वर्षदेखि लड्दै आएका 'सहकारी बचतकर्ता संरक्षण राष्ट्रिय अभियान'का अध्यक्ष कुशलव केसीमाथि ठूलो बज्रपात आइपरेको छ । उनले आफ्नो पहिलो सन्तान गुमाउनुपरेको हो । 

हिजो दिउँसो भक्तपुर अस्पताल भर्ना गरिएकी कुशलवकी श्रीमती अलिशा अधिकारीको साँझ गर्भ तुहिएको बताइएको छ । पाँच महिना नौ दिनमै व्यथा लागेपछि उनलाई अस्पताल भर्ना गरिएको थियो । खानपिन र गर्भवती अवस्थामा चाहिने हेरचाह नपुगेको कारण सो अवस्था आएको डाक्टरले बताएका छन् । 

अभियानका प्रवक्ता पुरुषोत्तम कार्की सहकर्मी कुशलवले असह्य पीडाको सामना गर्नुपरेको बताउँछन् । ‘उहाँ सहकारी पीडित होइनन् । तैपनि सहकारी पीडितका लागि लडिरहनुभएको थियो । पहिलो सन्तान गुमाउनुपर्दा उहाँलाई भएको पीडाको महसुस कसैले पनि गर्न सक्दैन । झन् उहाँकी श्रीमतीमाथि के बितेको होला ?’,उनले भने । 

घरमा गर्भवती श्रीमतीलाई एक्लै छोडेर केसी लगातार १०८ दिन बिहान ७ बजेदेखि १० बजेसम्म सहकारी पीडितहरुसँग आन्दोलनमा खटिएको कार्कीले बताए । 

सहकारी पीडितको बचत फिर्ता माग्दै केसीको नेतृत्वमा पटकपटक आन्दोलन भइसकेको छ । गत चैत २ गते सहकारी पीडितको आन्दोलनका क्रममा प्रहरीको कुटाइबाट घाइते केसीको स्वास्थ्य अवस्था गम्भीर बनेको थियो ।