आज पनि प्रधानमन्त्रीका सबै कार्यक्रम रध्द

प्रतिकूल स्वास्थ्य अवस्थाका कारण दुई दिनदेखि बालुवाटारमा आराम गरिरहनुभएका प्रधानमन्त्री केपी शर्मा ओलीको पूर्वनिर्धारित आजको सम्पूर्ण कार्यक्रम रद्द गरिएको छ । 

स्वास्थ्य अवस्थामा सुधार नभएपछि आजका लागि तय भएको कार्यक्रम  स्थगित गरिएको बुझिएको छ । आज बिहान १० बजे उहाँ हेलिकप्टरमार्फत पाल्पाको बगनासकाली गाउँपालिका जाने कार्यक्रम थियो । 

सवा ११ बजे गाउँपालिकाको प्रशासकीय भवन समुद्घाटन,सवा १२ बजे हेलिकप्टरमार्फत अन्तर्राष्ट्रिय सम्मेलन केन्द्र प्रस्थान,साढे १२ बजे तिनाउ गाउँपालिका भवन समुद्घाटन,सिद्धबाबा सुरुङ्ग ब्रेक–थ्रु,मन्दिर शिलान्यास,दिउँसो २ बजे बुटवलको गोरुसिङ्गे सडक शिलान्यास सभा र साढे ३ बजे अन्तर्राष्ट्रिय सम्मेलन केन्द्रबाट काठमाडौं फिर्ता हुने कार्यक्रम निर्धारित थियो । 

तर, चिसोका कारण घाँटीमा समस्या भएपछि बुधबारदेखि बेड रेष्टमा रहनुभएका प्रधानमन्त्रीले आजका सबै कार्यक्रम ‘क्यान्सिल’ गरेको उहाँको सचिवालयले जनाएको छ । 

मंगलबार बेलुका बालुवाटारमै एमाले सचिवालय बैठक डाकेर बामदेव गौतमको पार्टी प्रवेशसम्बन्धी प्रक्रियामा सम्पूर्णतः रोक लगाउने निर्णय गराउनुभएका उहाँ राती दुई बजेसम्म कसैको जन्मदिनमा सरिक हुनुहुन्थ्यो । त्यस अवसरमा खाएको केक र चिसो मौसमबीच अबेरसम्म रात्री बसाईका कारण ओलीको स्वास्थ्य बिग्रिएको बुझिएको छ ।