पूर्वराजालाई नयाँ सुरक्षा कमाण्डर, बाहिरका फौज उपत्यका भित्र्याईंदै

सरकारले पूर्वराजा ज्ञानेन्द्र शाहको सुरक्षा संख्या घटाएको छ । अस्ति राजधानीको तीनकुने र कोटेश्वर क्षेत्रमा राजावादी प्रदर्शनका क्रममा भएको आगलागी,तोडफोड र लुटपाटलगत्तै शाह र उहाँको निर्मल निवासमा तैनाथ सुरक्षा टोलीबाट एक दर्जन सुरक्षाकर्मी झिकिएको छ ।

यसअघि डिएसपी जगदीशचन्द्र हमालको कमाण्डमा रहेका २८ जनाको टोलीलाई पूर्व रास्ट्रपतिसरह १६ मा सीमित गरेर डिएसपी प्रमोदप्रकाश पाठकलाई कमाण्डर खटाइएको छ । गृह मन्त्रालय स्रोतका अनुसार भूतपूर्व राष्ट्र प्रमुखलाई १६ जना सुरक्षाकर्मी खटाउने व्यवस्था छ । तर, आवश्यकताअनुसार भन्ने सिद्धान्तमा  टेकेर निर्मल निवासमा थप १२ जना खटाइएको थियो ।

स्रोत भन्छ, ‘अहिलेसम्म २८ जना खटाइएकोमा हिजोदेखि १६ जना कायम गरिएको छ । हुनतः पूर्वराजा, पूर्वरानी,पूर्वयुवराज्ञी र तिनका छोराछोरी सबैको सवारी तथा निर्मल निवासको सुरक्षामा समेत खटिनुपर्ने भन्दै आवश्यकताअनुसार एक दर्जन बढीको सुविधा दिइएको थियो । शुक्रबारको घटनापछि गृह मन्त्रालयको मौखिक निर्देशनअनुसार सशस्त्रले सुरक्षा टोली घटाएको हो ।’

निर्मल निवासमा अस्तिसम्म तैनाथ  जगदीश हिजोेदेखि कार्यदल नम्बर १९ गण हेडक्वार्टर पुगेका छन् । निर्मल निवासको सुरक्षामा खटिएका डिएसपी प्रमोद उपत्यका हेर्ने ९ नम्बर बाहिनी बलम्बूमा थिए । 

उक्त बाहिनीको कमाण्डर नियुक्त डिआइजी सुरेशकुमार श्रेष्ठ भर्खरै विदेश मिसनबाट फर्किएका हुन् । लुम्बिनी बस्दा सिपाहीको राशनले ब्यारेकभित्र दिनदिनै परिवार र नातापाताको भतेर चलाउने तर ड्युटीमा खटिएको इन्स्पेक्टरलाई एक पाउ मासु पनि छुन नदिने बन्दिपुरे किशोर प्रधानजस्तै यिनीमाथि पनि फिल्डमा फौज परिचालनको खासै अनुभव नभएको आरोप छ । इलामका श्रेष्ठलाई सुर्खेत जान भनिएको थियो तर गएनन् ।

यसबीच उपत्यकाको सुरक्षा चुनौतीलाई ध्यानमा राखेर सुरक्षा निकायहरुले थप जनशक्ति बाहिरका जिल्लाबाट ल्याउन थालेका छन् ।