बयान फेरेका साक्षीलाई सास्ती

अख्तियार दुरुपयोग अनुसन्धान आयोगले अदालतमा बयान फेरेका सरकारी साक्षीविरुद्ध मुद्दा दायर गरेको छ । घुस–रिसवत लिई भ्रष्टाचार गरेको मुद्दामा सरकारी साक्षीको रुपमा पेश गरिएका संखुवासभाको पाँचखपन नगरपालिका–६, का भोजराज भट्टराईविरुद्ध मुद्दा दर्ता गरिएको छ ।

आयोग मुख्यालय टंगालबाट खटिएको टोलीले गत पुस १४ गते ताहाचलस्थित राष्ट्रिय किताबखाना (शिक्षक) मा कार्यरत शाखा अधिकृत धनेश्वर प्रसाईंलाई तीन लाख रुपैयाँ घुससहित समातेको थियो । अनुसन्धानको क्रममा उनले पेन्सनपट्टा बनाइदिने भन्दै भट्टराईसँग घुस बुझेको खुलेको थियो । अख्तियारका अनुसार अनुसन्धान अधिकृतसमक्ष बयान दिने क्रममा उनले पनि सो कुरा स्वीकारेका थिए । 

त्यसकारण उनलाई सजायमा समेत छुट दिइयो । तर, विशेष अदालत काठमाडौंमा बकपत्र गर्दा भट्टराईले आयोगमा अनुसन्धानको क्रममा गरेको बयान व्यहोरा प्रतिकूल हुने गरी दिएको अख्तियारको ठहर छ । अख्तियारले भ्रष्टाचार निवारण ऐन, २०५९ को दफा ३ बमोजिम कैद र जरिवाना हुन मागदाबीसहित उनीविरुद्ध आज विशेष अदालतमा आरोपपत्र दायर गरेको छ ।