यताबाट एक जना अमेरिकीलाई ‘डिपोर्ट’को तयारी

नेपाल विद्युत प्राधिकरणको प्रबन्ध निर्देशकबाट कुलमान घिसिङलाई हटाइएको सरकारको निर्णयविरुद्ध राष्ट्रिय प्रजातन्त्र पार्टीले चैत १४ गते माइतीघरमा प्रदर्शन गर्यो । राप्रपा  ‘सुन्दरी’ भनेर चिनिएकी खुश्बु ओलीसमेत सहभागी प्रदर्शनमा एक विदेशी नागरिक पनि देखिएका थिए । उनको हातमा कुलमानको समर्थनमा लेखिएको प्लेकार्ड थियो, तर उनी भने अंग्रेजी लवजमा ‘राजा आउ, देश बचाउ’ भन्दै चिच्याइरहेका थिए । उक्त भिडियो समाजिक सञ्जालमासमेत भाइरल भएको थियो । 

ती विदेशी अमेरिकी नागरिक जुलियन किर्पल हुन् । उनलाई सोही कारण दुई वर्ष नेपाल प्रवेश गर्न नमिल्नेगरी देश निकाला (डिपोर्ट) गर्न लागिएको छ । प्रदर्शनकै क्रममा पक्राउ परेका ५८ वर्षीय जुलियनलाई अध्यागमन विभागले डिर्पोट प्रक्रिया अघि बढाएको बताइन्छ । 

त्यसका लागि गृह र पराष्ट्र मन्त्रालयले स्वीकृति दिइसकेकाले बढीमा एक हप्ताभित्र अमेरिकी नागरिक फिर्ता भइसक्ने विभागीय स्रोतले जनाएको छ । अमेरिकाले गत तीन महिनामा पाँच दर्जन बढी नेपालीलाई अमेरिकाबाट निकाला गरिसकेको छ । उसले अवैध विदेशीलाई निष्कासन गरेको जनाएको छ भने नेपालले आन्तरिक मामिलामा दखल पुर्याउने उद्देश्यले सक्रिय अमेरिकीलाई त्यस्तै कारबाही गर्न लागेको हो ।