इजरायलमा नेपाली लोकगीत सार्वजनिक

धार्मिक तथा पर्यटकीयस्थल प्रवर्द्धन गर्ने उदेश्यले तेह्रथुम फेदाप–२ ओयाक्जुङ घर भई हाल इजरायलमा कार्यरत गीतकार तथा समाजसेवी देव बाँस्कोटाको छैठौं प्रस्तुती ‘मझौ देवीथान’ सार्वजनिक गरिएको छ ।

परदेशी भूमिमा रहेर पनि सामाजिक क्षेत्रमा सक्रिय बाँस्कोटाले आफ्नो गाउँको धार्मिक तथा पर्यटकीय स्थललाई चिनाउने उद्देश्यले उक्त गीत सार्वजनिक गरेको बताएका छन् ।

गीतमा चर्चित गायक अमृत खाती र गायिका लक्ष्मी गड्तौला (बाँस्कोटा) को स्वर रहेको छ भने देव बास्कोटा तथा अमृत खातीको संगीत रहेको छ ।
यसअघि बाँस्कोटाका तेह्रथुम सिंहबाहिनी, कस्तो रहिछ जुनी, काँडेतारको जाली, पिपल छेउमा वर, पोहोरको चोलीलगायतका गीत सार्वजनिक भइसकेका छन् ।

पूर्वी लोकभाकामा गाइएको उक्त गीतमा तेह्रथुमस्थित आस्थाकी देवी मझौ देवीथानको महिमा गाइएको छ ।

-रामप्रसाद ढुंगेल युएइ