मेलम्चीको पानी हिजोको आजै रोकिनाले…

मेलम्चीको पानी काठमाडौं उपत्यकामा ल्याइएको उपलक्ष्यमा हिजो राष्ट्रपति विद्यादेवी भण्डारीबाट भृकुटी मण्डपमा उद्घाटन गरिएकोमा २४ घण्टा नबित्दै आज समस्या देखिएको छ । सुनौलो रङ्गमा पानी झर्ने धारासहित वरपर वाटर फाउण्टेन समेत बनाइएको थियो ।

तर, आज फाउण्टेनमा पानी आउन बन्द भएको छ । हिजो उद्घाटन र आजै अलपत्र भएको भृकुटी मण्डपको नयाँ धाराबारे जिज्ञासा राख्दा खानेपानी मन्त्रालयका अधिकारीले फाउण्टेनको एउटा साइडमा रहेको भल्भ बिग्रेकाले पानी बन्द भएको बताए । उनले ‘सेक्युरिटी नभएकाले कसैले चलाइदिँदा फाउण्टेन बिग्रिएको’ र अब प्राविधिकहरुले हस्तक्षेप गरेलगत्तै सबथोक ठीकठाक भैसकेको भनेका छन् ।

हिजो सौन्दर्यको लागि राखिएको फाउण्टेन बिग्रिएपछि पञ्चायतकालको पञ्च र्याली र राजाको जिल्ला भ्रमणलाई जोडेर व्याख्या गर्ने एकाध उपबुज्रुक अहिले बेलुकी प्रदर्शनीमार्गमा कराउँदै थिए । मुलुकमा कृषिको विकास भएको देखाउन तराईमा स्याउ र हिमाली जिल्लामा केराको बोटमा लटरम्म फल फलेको देखाइन्थ्यो । अहिले राष्ट्रपतिलाई पनि त्यसैगरी फाउण्टेन र धारा जडान गरेर कृत्रिम प्रदर्शन गरिएको भन्नेहरू समेत भेटिए ।