पल शाहले बलात्कार नगरेको, बालयौन दुरुपयोग गरेको ठहर

जबर्जस्ती करणी अभियोगमा थुनामा रहेका अभिनेता पल शाहलाई बाल यौनदुरुपयोगको कसूरमा अढाई वर्ष जेल सजाय सुनाइएको छ । आज नवलपुर जिल्ला अदालतका न्यायाधीश यज्ञप्रसाद आचार्यको इजलासले बलात्कार मुद्दामा शाहलाई निर्दोष ठहर गर्दै बाल यौन दुरुपयोग कसूरमा मात्रै सजाय तोकेको हो ।

हालै न्यायाधीश नियुक्त भएर गएका आचार्यको इजलासले शाहलाई अढाई वर्ष जेल सजाय र १० लाख क्षतिपूर्ति दिनुपर्ने फैसला गरेको छ । अदालतले २५ हजार जरिवानाको सजाय पनि सुनाएको छ । बालयौन दुरुपयोगमा तीन वर्षसम्म कैद सजाय हुने व्यवस्था छ । तर, शाहलाई अढाई वर्षमात्रै कैद सजाय तोकिएको हो ।

अभिनेता शाहविरुद्ध बलात्कार अभियोगमा मुद्दा दर्ता भएको थियो । तर, उक्त कसूरमा भने उनलाई अदालतले सफाई दिएको छ । जाहेरीकर्ता ‘होस्टाइल’ भएकाले बलात्कारमा कसूर ठहर नभएको बताइएको छ । बयानका क्रममा पीडित र जाहेरवालाले नै बयान फेरेर घटना झुठो भएको बताएका थिए । लामो समयदेखि विचाराधीन मुद्दा किनारा लागेसँगै शाहलाई पुनरावेदनमा जाने बाटोसमेत खुलेको छ ।

यसअघि शाहको तर्फबाट वरिष्ठ अधिवक्ता यदु खनाल, अधिवक्ता गणेश अधिकारी, चेतनारायण भुसाललगायतले बहस गरेका थिए भने जिल्ला न्यायाधिवक्ता कमलराज पन्थी, न्यायाधिवक्ता दालबहादुर थापा र सहायक न्यायाधिवक्ता बुद्ध थापाले सरकारको प्रतिरक्षा गरेका थिए । जाहेरीवालाले नै आरोप झूठो भनेर बयान दिएकाले पीडितका तर्फबाट भने कोही पनि बहसका लागि उपस्थित भएनन् ।

घटनाको समयमा नाबालिग रहेकी एक गायिकाले शाहले बलात्कार गरेको भन्दै नवलपुर र तनहुँमा छुट्टाछुट्टै जाहेरी दिएपछि शाहले दुवै जिल्ला अदालतमा मुद्दा खेपिरहेका छन् । तनहुँ अदालतले यसअघि उनलाई पूर्पक्षका लागि थुनामा पठाउन आदेश भएको थियो भने त्यसविरुद्ध पुनरावेदन गरेकोमा उच्च अदालतले तलको आदेशलाई सदर गरेको थियो । त्यसैले आज सफाइ पाएको भए पनि उनी थुनामुक्त भने हुने थिएनन् ।