ट्रकमा हालेर राताराता गाँजा पारी

भारतबाट अवैध सामान, लागुऔषध र स्रोत नखुलेको मोटो रकम ल्याउने क्रम बढेसँगै यताबाट रातको समयमा गाँजा लैजाने प्रवृत्ति बढेको हो । बारामा हिजो पनि डेढ सय केजी गाँजा बरामद भएको छ ।

हिजो राति १० बजेको समयमा बाराको महागढीमाई नगरपालिका ५, तेलगाईको बाटो हुँदै भारततर्फ लैजान खोजिएको गाँजा सशस्त्र प्रहरी बलले पक्रेको हो । बा.५ख ८०७५ नम्बरको ट्रकमा १० वटा पोकामा १५ केजीको दरले लैजान खोजिएको उक्त परिमाणको गाँजा समातिएको हो ।

सशस्त्र प्रहरी बलको टोलीले गाँजासहित ट्रक, ट्रक चालक र अर्का एक जना भारतीयलाई नियन्त्रणमा लिएको बताइएको छ । नियन्त्रणमा लिइएकामा मकवानपुरको कैलाश गाउँपालिका ६, सानुलेखका २९ वर्षे राजकुमार रुम्बा र भारतको मोतीहारी, संग्रामपुर ११ का श्यामलाल महतोलाई प्रहरीले पक्रेको हो ।उनीहरुलाई हिजो रातिदेखि बलको बेनौली बेसमा राखिएको छ ।