रुपन्देहीमा भन्सार छलिएको पेयपदार्थ बरामद

रुपन्देहीमा भन्सार छलेर ल्याइएको १० लाख रपैयाँ बढीको सामान प्रहरीले नियन्त्रणमा लिइएको छ ।

आज ओमसतिया गाउँपालिका २ पड्षरीबाट भन्सार छलेर ल्याइएको १० लाख १५ हजार एक सय २० रुपैयाँको विभिन्न पेयपदार्थ बरामद गरिएको हो ।

भारतबाट नेपालतर्फ आँउदै गरेको ग.२ च ४६९७ नम्बरको गाडीले अवैध रुपमा भन्सार छली गरेर सामान ल्याएको सूचनाका आधारमा जिल्ला प्रहरी कार्यालय, रुपन्देहीले प्रहरी टोली खटाएको थियो ।

टोलीले सामानसहित चालकलाई पनि नियन्त्रणमा लिएको छ । पक्राउ पर्नेमा कास्कीका दामोदर चापागाई र स्याङ्जाका विशाल तिवारी रहेका छन् ।

उनीहरुको साथबाट रेडबुल ११२ कार्टुन (२२४४ पिस) र बदाम जुस १५४ कार्टुन (१८४८ पिस) बरामद गरेको प्रहरीले जनाएको छ ।

प्रहरीकाअनुसार बरामद सामान, गाडी र चालकलाई आवश्यक कारबाहीका निम्ति भन्सार कार्यालय, बेलहिया पठाइएको छ ।