यताकाहरु दशैं खर्च उठाउन मस्त, उताकाहरु चरेस समात्नमा व्यस्त

कपिलवस्तुको कृष्णनगर नाका प्रयोग गरी भारततर्फ लैजाँदै गरिएको चरेस भारतीय सीमा सुरक्षा बल (एसएसबी) ले पक्राउ गरेको छ । अस्ति बेलुकीको समयमा एसएसबीले चार किलो चरेससहित दुई जना नेपालीलाई पक्राउ गरेको हो ।

भारतीय सुरक्षाकर्मीले विशेष सूचनाको आधारमा उनीहरुलाई पक्राउ गरिएको बताएको छ । कृष्णनगर नाकाबाट दैनिक चरेसको ओसारपसार बढेको देखिन थालेको भारतीय पक्षको आरोप छ । असोज १ गते सशस्त्र प्रहरी बल कृष्णनगर बिओपीले झण्डै चार किलोग्राम चरेससहित एक जनालाई पक्राउ गरेपछि नेपाल प्रहरीलाई थप अनुसन्धानको जिम्मा दिइएको थियो । सो क्रममा इलाका प्रहरी कार्यालय कृष्णनगरले २ किलो ७ सय ग्राम चरेससहित दुई जनालाई पक्राउ गरेको थियो ।

अहिले तिनै प्रहरी दशैं खर्च उठाउनमा व्यस्त भएको स्थानीयको आरोप छ । एसएसबीले चरेससहित पक्राउ गरेका दुई जनामध्ये एक जना नेपाली कृष्णनगर नगरपालिका १०,सौनहवाका ५८ वर्षका रामनरायण कहार हुन् ।

त्यसैगरी अर्का एक जना भारतको उन्नावका ४८ वर्षीय दौलत खेडा हुन् । उनीहरुलाई पक्राउ गरी थप अनुसन्धान भैरहेको भारतीय स्रोतले बतायो । सीमा नजिकै भारतको बढनीमा चार किलोग्राम चरेस पक्राउ परे पनि नेपालतर्फका सुरक्षा निकाय आजसम्म अनभिज्ञ देखिएका छन् ।