गुल्मी २ मा गोकर्ण बिष्ट दोहोरिए, निर्वाचन रोमाञ्चक रहेको झाँक्रीको अनुभूति

गुल्मी निर्वाचन क्षेत्र नम्बर २ मा एमाले सचिव गोकर्ण बिष्ट विजयी भएका छन् । उनले २८ हजार ४७६ मत प्राप्त गरेको निर्वाचन अधिकृतको कार्यालयले जनाएको छ । निकटतम प्रतिस्पर्धी नेकपा एकीकृत समाजवादीकी सचिव रामकुमारी झाँक्रीले २६ हजार ४४२ मत ल्याएकी छन् । बिष्टले २ हजार ३४ मतान्तरले जितेका हुन् ।

मत परिणामपछि झाँक्रीले निर्वाचन आफ्नालागि अत्यन्तै रोमाञ्चक रहेको प्रतिक्रिया दिएकी छन् । उनले ज्ञानको हिसाबले कुनै प्रसिध्द विश्वविद्यालयमा पढेभन्दा बढी जानकारी प्राप्त भएको बताइन् । 

उनले सामाजिक सञ्जालमा लेखेकी छन्, ‘समाज र सामाजिक जीवनका थुप्रै पक्षको बारेमा समाजको पिँधसम्म पुगेर हेर्ने,बुझ्ने,जान्ने मौका पाएँ । यो साढे दुई दशकमा समाजलाई गलत प्रयोग गरिएको थाहा पाइयो । त्यो लोकतन्त्रको लागि गम्भीर छ,डरलाग्दो छ ।’ 

निर्वाचनमा विजयी बिष्टलाई ‘मेरो आदरणीय दाजु अग्रजलाई हार्दिक बधाई र सफल कार्यकालको शुभकामना,’उनले भनेकी छन् ।