जित्ने प्रचण्डलाई पराजित मियाँको बधाई

नेकपा माओवादी केन्द्रका अध्यक्ष पुष्पकमल दाहाल प्रचण्ड प्रतिनिधि सभा सदस्यमा चौथो पटक निर्वाचित हुनुभएको छ । 

प्रचण्डका प्रतिस्पर्धीहरुमध्येका एक नेकपा एमालेका उम्मेदवार अब्दुस मियाँले उहाँलाई बधाई दिएका छन् । गोरखा निर्वाचन क्षेत्र नम्बर २ बाट निर्वाचित प्रचण्डलाई मियाँले बधाई तथा शुभकामना व्यक्त गरेका हुन् ।

सामाजिक सञ्जालबाट बधाई दिँदै मियाँले गोरखालाई बत्तीमुनिको अँध्यारोबाट सम्बृध्दिको केन्द्रको रुपमा स्थापित गर्न आग्रह गरेका छन् । उक्त कार्यमा आफूले प्रचण्डलाई सक्दो सहयोग गर्ने प्रतिबद्धता पनि जनाएका छन् । 

मियाँले जीवनको पहिलो चुनावी प्रतिस्पर्धाको अनुभवले आफूलाई अझ जिम्मेवार र परिपक्व बनाएको उल्लेख गरेका छन् । 

आज बिहान सार्वजनिक मतपरिणामअनुसार प्रचण्डलाई २६ हजार १०३ मत प्राप्त भएको छ । त्यस्तै, निकटतम प्रतिस्पर्धी राष्ट्रिय स्वतन्त्र पार्टीका कविन्द्र बुर्लाकोटीले १२ हजार ६३७ र मियाँले सात हजार ३९३ मत प्राप्त गरेका छन् ।